Ніва № 30 (2359), 29 ліпеня 2001 г.

Адгулялі „Басовішча”

Мікола ВАЎРАНЮК

Пераможцамі дванаццатага Фестывалю музыкі Маладой Беларусі сталі чатыры гурты: па два з Беларусі і Беласточчыны. Галоўны арганізатар мерапрыемства — Беларускае аб’яднанне студэнтаў — сваю ўзнагароду прысудзіў гомельскаму гурту „Бан Жвірба”, які ўмела спалучае цяжкае гучанне сучасных электрычных інструментаў з народнымі прапачаткамі нашай культуры. Гаспадар сцэны — войт гміны Гарадок — узнагародзіў „Праект 2001”, які заснавала адмыслова дзеля „Басовішча” група маладых людзей з розных мясцовасцей Беласточчыны: Гайнаўкі, Бельска-Падляшскага, самога Беластока. Аб’яднала іх прага выказаць свае пачуцці, свае адносіны да свету на беларускай мове. Беларускі саюз у Рэчы Паспалітай узнагародзіў беластоцкі гурт „0 85”. Калектыў стварылі музыкі, якія ўжо паказваліся на „Басовішчы” ў розных саставах. Цяпер аб’ядналіся вакол колішняга вакаліста „Брагі” — Юркі Асенніка. Беластоцкая студыя „Герц” сваю ўзнагароду — запіс альбома — дала мінскаму гурту „Імпэт”. Гэты гурт існуе ўсяго год і магчымасць запісаць першы альбом як найбольш дарэчы.

Сёлетняе дванаццатае „Басовішча” было адным з найвялікшых за ўсю гісторыю фестывалю. Першай ноччу — з 20 на 21 ліпеня — на сцэне запрэзентаваліся 20 гуртоў з Беларусі, Польшчы і адзін з Вялікабрытаніі. Другой ігралі пераможцы і вядомыя з ранейшых выпускаў фестывалю зоркі, між іншым „Крыві”, „Уліс”, „Крама”, „Палац”, „Н.Р.М.” ці мінулагодні лаўрэат — „Ріма” з Гарадка. Польскім госцем быў гурт „Піджама порна” з Познані. Пад іх музыку 9 гадзін запар гулялі тысячы маладых людзей.

(Шырэй пра „Басовішча 2001” у наступным нумары.)