Візіт патрыярха Варфаламея І

Віталь ЛУБА

У суботу, 22 студзеня, патрыярх Варфаламей І сустрэўся ў Варшаве з Польскай экуменічнай радай, а таксама наведаў першаіерарха Рымска-каталіцкага касцёла ў Польшчы кардынала Юзэфа Глемпа ў ягонай рэзідэнцыі. На думку прымаса Польшчы, візіт Усяленскага патрыярха — гэта адзін са знакаў імкнення да прыбліжэння хрысціян. Патрыярх у сваю чаргу адзначыў, што нягледзячы на розніцы, якія раздзяляюць абедзве Царквы, усе мы — браты ў Хрысце і служым гэтаму ж Хрысту, хаця кожны па-свойму. Першы дзень візіту завяршыўся сустрэчай у турэцкім пасольстве ў Варшаве.

Галоўнай мэтай візіту Канстанцінопальскага патрыярха было ўдзельніцтва ў цэнтральных святкаваннях Вялікага Юбілею 2000 года, арганізаваных Польскай аўтакефальнай праваслаўнай царквой у Вроцлаве. У нядзелю, 23 студзеня, у вроцлаўскім Кафедральным саборы Нараджэння Прасвятой Дзевы Марыі Усяленскаму патрыярху саслужылі ўсе іерархі нашай Царквы. Мітрапаліт Сава ў пропаведзі адзначыў, што сустрэча вернікаў Вроцлаўска-Шчэцінскай епархіі з Яго Свяцействам Варфаламеем І была асабліва важнай для людзей, вывезеных са сваёй бацькаўшчыны ў 1947 годзе, якім стала яна духовай падтрымкай.

24 студзеня, у панядзелак, саноўны госць правёў размовы з прэзідэнтам РП Аляксандрам Кваснеўскім і прэм’ер-міністрам Ежы Бузкам. Затым патрыярх наведаў Свята-Ануфрыеўскі манастыр у Яблачыне, дзе яго прывіталі шматлікія вернікі. Пасля абеду ўдзельнічаў ён у малебне ў царкве св.св. Кірылы і Мяфодзія ў Белай-Падляшскай, сустрэўся з духавенствам Холмска-Люблінскай епархіі і рымска-каталіцкімі біскупамі. Вечарам госць прымаў удзел у афіцыйным прыёме, ладжаным паслом Грэцыі ў Польшчы.

У апошнім дні візіту, 25 студзеня, Усяленскі патрыярх сустрэўся з міністрам замежных спраў Браніславам Герэмкам, з якім гутарыў аб экуменічным дыялогу і правах чалавека. Пасля сустрэчы кіраўнік знешнепалітычнага ведамства сказаў, што візіт Варфаламея І быў важнай падзеяй для польскай замежнай і міжнароднай палітыкі. Дадаў ён яшчэ, што часта выказваюцца меркаванні аб тым, што адыходзячае ХХ стагоддзе стварае перспектывы цывілізацыйных і рэлігійных падзелаў, якія могуць стаць прычынай войнаў. „Экуменічны дыялог, аб якім гаварыў Варфаламей І і якога вялікім прыхільнікам з’яўляецца таксама Ян Павел ІІ, прадстаўляе адваротную тэндэнцыю — тэндэнцыю да інтэграцыі, да аб’ядноўвання людзей”, — падкрэсліў міністр Герэмэк.

Патрыярх сустрэўся таксама з кіраўнікамі польскага парламента: маршалкамі Сената — Аліцыяй Гжэськовяк і Сейма — Мацеем Плажынскім ды выступіў з прамовай да парламентарыяў (чытайце артыкул Наталлі Грышкевіч „Патрыярх у парламенце” на гэтай жа старонцы). Усяленскі патрыярх Варфаламей І быў першым прадстаўніком некаталіцкага веравызнання, які выступіў перад польскімі парламентарыямі.

Перад ад’ездам Яго Свяцейства Варфаламей І сустрэўся з мітрапалітам Савам і епіскапамі ў сядзібе Варшаўскай мітраполіі.