Кросны і аб’ектыў: як на Падляшшы нараджаюцца «Фота Сплёты» і «Пагоня»

Уладзімір РАМАНОВІЧ

Другі дзень ткацкай выставы ў Беластоку, арганізаванай Падляшскім інстытутам культуры, падарыў наведвальнікам адчуванне сапраўднага свята жывой традыцыі. Гэта не проста экспазіцыя старадаўніх рэчаў з куфраў — гэта прастора, дзе мінулае вельмі тонка і смела пераплятаецца з сучаснасцю. Вырашыў я прайсціся па выставе ў другі дзень мерапрыемства і зрабіць некалькі інтэрв’ю з майстрамі, якія ствараюць новую гісторыю падляшскага ткацтва.

Частка 1: Кросны і аб’ектыў: як на Падляшшы нараджаюцца «Фота Сплёты»

Ад пачатку маю ўвагу прыцягнуў стэнд з інтрыгуючай назвай «Foto Sploty». Гэта прастора, дзе сучаснасць вельмі тонка пераплятаецца з традыцыяй. Мне ўдалося пагутарыць з заснавальніцай гэтага праекта Ганнай Леўчук.

— Што менавіта значаць «Foto Sploty»?

— «Foto Sploty» аб’ядноўваюць дзве мае прыхільнасці. Адна з іх — фатаграфія, а другая — ткацтва. Паколькі я не магла выбраць нешта адно, а хацела займацца і тым, і іншым, то вырашыла іх злучыць. Я шукала спосаб, як гэта зрабіць, і прыйшла да ідэі ткаць на аснове ўласных здымкаў.

— Гэта здымкі падляшскіх краявідаў?

— Так. Я падарожнічаю па Падляшшы. Фатаграфую пераважна прыроду, прычым у вельмі вузкіх кадрах. Назіраю за спалучэннем колераў, рознымі фактурамі — бо гэта вельмі блізка да тканіны. У ткацтве мы таксама злучаем розныя структуры і колеры. Гэтыя (...)