У цені крыжоў на Грабарцы

Уршуля ШУБЗДА

На Святой Гары Грабарцы паломнікі сустрэліся на супольнай малітве. 18 жніўня ў 18 гадзін служылася тут святая літургія ў гонар Праабражэння Гасподняга. Нягледзячы на дождж, Грабарка ізноў прыняла тысячы вернікаў, а вечарам загарэлася ад свечак. Святую літургію ўзначаліў архіепіскап Авель.

На тыдзень да вялікага свята на Грабарцы выходзілі паломнікі, каб супольна памаліцца ў час важнага свята ў праваслаўным календары літургічнага года. Не толькі машыны шчыльна абставілі паркоўкі пад гарой, але таксама многія, як штогод, вырашылі прысвяціць час, каб паломнічаць і з асаблівай інтэнцыяй стаць на гары.

Грабарка на вечаровай малітве была запоўнена людзьмі. Ля галоўнага алтара ў час вячэрняй літургіі хваля каляровых парасонаў шчыльна абляпіла берагі гары, якія цягнуцца ўніз аж да высокага паркана.

Наперакор зменліваму надвор’ю, на Святой Гары Грабарцы моцна прагучалі словы архіепіскапа Авеля, які заклікаў: «Radujcie się!»

Пасля набажэнства вечар стаў ціхім. Ад дажджу засталося балота, якое растоптвалі тысячы паломнікаў, ходзячы вакол галоўнай царквы Марфы і Марыі. Чарга ў царкву была доўгай. Адны дзверы адкрываліся для ўваходзячых, другія выпускалі тых, якія пабылі ў сярэдзіне прыгожа размаляванага храма з цікавымі іконамі святых.

Спевы і малітвы плылі з алтара ўніз. Было іх чуваць і за парканам, дзе цягнуцца ларкі з усялякім таварам. Свежае паветра лесу пасля дажджу і (...)