Cтарадаўнія падляшскія традыцыі ажываюць у Новай Волі

Міра ЛУКША

Новая Воля ў Міхалоўскай гміне ў другі раз ператварылася ў вялікую вясельную залу пад адкрытым небам. Традыцыйны карагод, каравай, дружкі-нявесты, песні і сумеснае застолле сабралі жыхароў гміны. Другое выданне «Салэцкага вяселля» паказала, што ідэя сумеснага ўзнаўлення старадаўніх абрадаў мае шанцы стаць адной з самых адметных падзей рэгіёна. Сёлетнімі жаніхом і нявестай былі Віялета Баканач з вёскі Бандары і Пятро Варона з вёскі Шымкі. Як яны самі прызналіся непасрэдна перад пачаткам цырымоніі, падрыхтоўка была даволі эмацыйнай.

— Выдатна, але не спалася паўночы, — смяяўся Пятро Варона.

— У мінулым годзе я была дружкай маладой, — дадала Віялета. — Гэта павінна было стаць традыцыяй — я злавіла кінуты маладзіцай вэлюм, а Пятро — гальштук-матылёк падчас вяселля, таму цяпер чарга была наша!

Адзін з найважнейшых сімвалаў старадаўніх вяселляў — каравай — таксама прысутнічаў.

— Мы хацелі ўвекавечыць і прадэманстраваць вясельную традыцыю. Вяселлі адбываюцца і сёння, але мы больш не ўбачым, каб выносілі каравай, а каравайніцы спявалі адмысловыя песні. Менавіта гэтыя элементы мы хочам выратаваць ад забыцця, — сказала вядучая імпрэзу гаспадыня Галена-Марыёля Рэент.

Каравай быў падрыхтаваны і спечаны напярэдадні жанчынамі з Бандароў.

— Жанчыны з сельскага жаночага гуртка скончылі пячы яго аж каля дзясятай вечарам. Ім дапамагалі дзеці і моладзь са (...)