Дзе за мяжой можна знайсці помнікі беларускім пісьменнікам? (ч.ІІ)

Алесь МАІСЕЕНКА

Якуб Колас. У гісторыі жыцця Якуба Коласа прасочваюцца некаторыя паралелі з жыццёвым шляхам Янкі Купалы. Колас таксама працаваў у газеце „Наша Ніва” ў Вільні, дзе ў памяць аб гэтым таксама ўсталяваная мемарыяльная дошка.

Падчас Другой сусветнай вайны, у 1941-1943 гадах, Колас таксама жыў на ўсходзе Савецкага Саюза. Праўда, не ў сённяшняй Расеі, як Купала, а ва Узбекістане. З удзячнасцю паэт прысвяціў гэтай краіне верш, у якім ёсць такія радкі:

У цяжкі час вайны суровай

Ты даў прытулак мне,

З узбекам песню адной мовай

Складалі аб вайне.

І меч адзін мы з ім кавалі

На злы варожы стан.

Няхай жа ўзносяць вышэй хвалі

Цябе, Узбекістан!

У Ташкенце на доме, дзе жыў Колас, усталяваная мемарыяльная дошка з барэльефам.

У жніўні 2018 года ў гонар беларускага паэта ў сталіцы Узбекістана таксама ўсталявалі яго бюст.

І яшчэ адна паралель з Янкам Купалам: на тэрыторыі Цяньцзіньскага ўніверсітэта замежных моў (Кітай), усталяваны бюст Якуба Коласа.

З 1917 да 1921 года паэт і пісьменнік разам з сям’ёй жыў у вёсцы Малыя Крукі ў Курскай вобласці (Расея). У гэты перыяд Якуб Колас працаваў настаўнікам і напісаў каля 20 вершаў. Пра тое, што там ён займаўся педагагічнай і асветніцкай дзейнасцю, паведамляе дошка ў горадзе Абаянь.

Максім (...)