ІІ Фестываль беларускай традыцыі «Сонцаграй»

Аляксей МАРОЗ

Другі выпуск Фестывалю беларускай традыцыі «Сонцаграй», які арганізуе Фонд «Тутака», завяршыўся 24 чэрвеня фінальным мерапрыемствам на пляжы Семяноўскага вадасховішча каля Бандароў. Прагучалі даўнія песні і музыка, адбыліся шматлікія майстар-класы, а сустрэча закончылася купальскім абрадам і танцамі. Адной з галоўных адметнасцей фіналу быў удзел у ім вялікай колькасці маладых эмігрантаў, якія вымушаны былі ўцякаць з Беларусі ў Польшчу. Прыбылі яны на фінал фестывалю з Беластока, Варшавы і іншых мясцовасцей. Канешне, сярод публікі былі беларусы Беласточчыны і турысты з розных бакоў Польшчы, якія адпачывалі на Семяноўскім вадаёме.

Фінальную сустрэчу адкрылі Зміцер Косцін з Фонду «Тутака», арганізатар Фестывалю «Сонцаграй» і яго суарганізатар бургамістр Міхалова Марк Назарка. Звярнуў ён увагу на патрэбу захавання традыцыі і культуры продкаў, чаму садзейнічаюць прэзентацыя на сцэне даўніх песень, музыкі і майстар-класы. Аліна Дэмбоўская запрэзентавала традыцыйны ручнік і правяла майстар-класы па выконванні на сумках народных узораў. Ірына Мазюк вучыла плесці беларускія паясы. Адзначыла яна, што маладыя жыхары Беларусі вяртаюцца да традыцыі, удзельнічаюць у фальклорных экспедыцыях. Пра гэта гаварыла мне таксама дзяўчына, якая ўдзельнічала ў мерапрыемстве.

— Жывучы ў Беларусі, мы з сябрамі ездзілі ў экспедыцыі, запісвалі ад старажылаў даўнія песні і абрады. Я была вымушана выехаць (...)