Рады роднаму абраду

Марыя КУЖАЛЕЎСКАЯ

У сядзібе Галоўнага праўлення Беларускага таварыства 20 лістапада можна было паглядзець старадаўнія абрады. Сабраных прывітаў старшыня ГП БГКТ Васіль Сегень. Прыгадаў гасцям пра адыход Яна Чыквіна і ўсе ўганаравалі памяць вядомага паэта хвілінай маўчання. Пасля на пару дзясяткаў хвілін сцэну заняў калектыў з Маліннік. Паказаў ён гледачам, як калісь праводзіліся асенне-зімовыя вечары ў вёсцы. Адна гаспадыня прала лён на калаўротку, іншыя вязалі кручкамі. Былі таксама гумарыстычныя моманты. Большасці сабраным гэтая тэматыка была вядомая і вартая ўспамінаў.

Чарговая група — «Асенні ліст» — прыехала з Гарадка з інсцэніроўкай «Шаптуха». Гаспадынькі вельмі ўчуліся ў свае ролі і ігралі як прафесійныя акцёркі. Хаця тэматыка сур’ёзная, бо ж пра хваробы, акцёркі ўмелі дадаць столькі гумарыстычных элементаў, што глядзельны зал проста качаўся ад смеху. Гледачы выразна былі ўсхваляваны і жыва каменціравалі тое, што адбывалася на сцэне. Кожны прыгадваў розныя нямогласці і спосабы, з якімі спраўляліся з імі ў даўнейшыя часы. Хаця прамінула шмат гадоў, пытанні пра шаптух часта сустракаюцца ў сацыяльных сетках. Відаць, тэматыка вельмі актуальная.

Трэці калектыў падрыхтавала Ала Каменская — гэта быў вясельны абрад. А калі вяселле — дык і музыка. Спадарыня Ала вядомая прыгожай ігрой на гармоніку, а яе гурт з вёскі Козлікі вядомы цудоўным спевам і жартамі, дык прыемна было паслухаць народных песень у іх выкананні. (...)