Ніва № 44 (3103), 1 лістапада 2015 г.
У палескай глыбінцы (20)Ганна КАНДРАЦЮКЮры пазваніў камусьці з Перабродаў, каб даведацца, хто са спевакоў застаўся ў жывых. Людзі, вядома, нявечныя. За хвілінудзве ўсё высветлілася. Сярод асоб, запісаных на кампактдыску „Polesie — pieśni i ludzie”, засталася Надзея Яўсовіч, 1941 года нараджэння. — Хочаш пагаварыць? — спытаў Юры дзелавіта, як менеджар. — Вядома, хачу. Вэльмі хачу. Паколькі апанавала мяне нечаканая радасць, змешаная з хваляваннем, я прыкусіла язык і замаўчала. Усё адбывалася неспадзявана, паводле лепшага сцэнарыя. Яшчэ нядаўна я змагалася з перашкодамі і страхам перад нязведанай тэрыторыяй. А тут — такое звышзразуменне і дапамога. — У нас таксама кажуць вэльмі, — прыкмеціў Юры. Цягам чарговых хвілін мой прыгодны знаёмы аформіў праз сваю мабілку чарговыя спатканні. У тым часе ён бойка змагаўся з выбоінамі на дарозе і распавядаў гісторыю свайго роду. Юры марыў наведаць Нямеччыну і адшукаць сям’ю свайго легендарнага дзеда. — Па фатаграфіі, — пачаў Юры, — я падобны на яго. Юры хацеў бы запаліць свечку на магіле дзеда, пабачыць, як ён абсталяваўся ў далёкім краі, пачуць працяг сямейнай гісторыі, якая раптам абарвалася ў сорак чацвёртым і моцна назначыла яго сям’ю. * * * — Мой дзед служыў у Радзівіла, — сказаў, — у апошняга, што тут жыў перад вайной. — У князя Карла Мікалая Радзівіла? — Не ведаю, хто гэты князь, Карл ён, ці хто? Яго палац непадалёк (...) |