Ніва № 28 (3087), 12 ліпеня 2015 г.
Пра дзеда Міхася і не толькіІаанна ЧАБАН— Ці Вы чулі пра бежанства? — пытаю занятага загатоўкай дроў на зіму старога чалавека. — Канешне, чуў, толькі ўжо пазабываў. Рыгор Бяганскі, 1935 года нараджэння, жыве па вуліцы Касцельнай у Крынках. Блізкасць касцёла і шляхецкае ў гучанні прозвішча толькі што напатканага чалавека застаўляла трымацца дамінуючага тут польскамоўя. — Запрашаю ў хату, не будзем гаварыць на вуліцы. Вузкай лесвіцай падымаемся на першы паверх старога, жыдоўскага будынка. — Ведаеце хто тут жыў? — пытаю майго суразмоўцу. — Жыды, але хто дакладна, цяжка сказаць. Тут жа гета было. Іх вывезлі, а хаты гміна прыкамандзіравала. Я пераехаў сюды пасля вайны. — Так вы не крынскія? — крыху здзіўляюся. — Я з Ласінян, праваслаўны. Усё зразумела, далей размаўляем ужо толькі па-беларуску. Заадно размываюцца мае думкі, што вось у мяне незвычайнае адкрыццё — крынскі каталік, якога продкі былі ў бежанстве. У невялікае памяшканне ўваходжу быццам у іншы свет. Усё тут колішняе, але яшчэ жывое. У цесным пераходзе паміж кухняй і пакоем вісіць заплямленая часам, у саліднай драўлянай рамцы люстра, ніжэй стаіць старая чорная, гравіраваная золатам, швейная машына, яшчэ цёплая ад карыстання. — Гэта Рыгор у нас шые, — інфармуе добрая і надта прыгожая, з ідэальнай прычоскай у стылі рэтра жонка. Спадар Рыгор зразу пераходзіць да тэмы нашай сустрэчы. Гаворыць, седзячы на выгадным крэсле, (...) |