Майстры па яйках

Міра ЛУКША

У гміннай бібліятэцы ў Нарве ўжо трэці раз моладзь і старэйшыя вывучаюць традыцыйнае здабленне велікодных яек. У суботу 9 красавіка майстар-клас пад кіраўніцтвам Альжбеты Вардэцкай з Гамотаў на Сямятыччыне сабраў поўную залу аматараў традыцыйнага здаблення велікодных яек, з розных пакаленняў. Меншыя дзеці займаліся спачатку выклейваннем шкарлупак каляровай паперай ці маляваннем іх фарбай. Старэйшыя вучні і бацькі засяроджана гуртаваліся каля гарачых лямпаў, над якімі ў баначках раставаў пчаліны воск. На вокнах стаялі вялікія слоікі з трыма фарбамі — жоўтай, зялёнай і чырвонай, а ў кухні ў трох колерах варыліся, па дваццаць хвілін, творча апрацаваныя ўжо яйкі. Пасля, калі яны астынуць, на іх будзе накладзены лак — для бляску і мацаты.

— Па чарзе накладваем слаі воску, — тлумачаць пастаянныя ўдзельніцы такіх майстар-класаў, якіх ужо не назавеш аматаркамі: ведаюць яны традыцыйны падзел малюнку, старажытныя і тутэйшыя ўзоры, якія наносяцца на шкарлупку, і тэхніку пісання палачкай з іголкай ці булаўкай на канцы: пані Аля, Бажэна, Ева... І Марцін, які вучыцца ў Варшаве: яму ўдаюцца ўзоры як на карціне Лявона Тарасэвіча!

— Пішу на белым яйку ўзор, — тлумачыць пані Аля, якая вырысоўвае зайца. — Пасля апускаю яйка ў жоўтую фарбу. Калі схачу мець на яйку жоўты ўзор, пасля на зафарбаваным жоўтым колерам яйку пішу наступны ўзор — ён пасля стане жоўты. Апускаем яйка ў зялёную фарбу. Пасля пішам воскам на ім — гэты (...)