„Знічка” — свеціць 15 гадоў

Аляксей МАРОЗ

Вядомы публіцы на Беласточчыне і з канцэртаў у Варшаве, Гданьску, Пунску, у Рэспубліцы Беларусь і Германіі вакальны калектыў „Знічка” дачакаўся 15-гадовага юбілею. Першы раз дзяўчаты са школьнага калектыву пры Агульнаадукацыйным ліцэі з беларускай мовай навучання ў Гайнаўцы выступілі ў кастрычніку 1995 года, на Дзень настаўніка. Набор у гурт і рэпетыцыі распачаліся яшчэ ў верасні і за кароткі перыяд белліцэісткі паспелі развучыць першыя беларускія песні. Пазней у рэпертуары калектыву паяўляліся новыя творы, напрыклад, апрацаваныя фальклорныя песні і сучасныя эстрадныя беларускія шлягеры. Па-за паасобнымі польскімі творамі, перш за ўсё з рэпертуару салістак, „Знічка” заўсёды выступае па-беларуску.

— Мы выхаваліся ў беларускай традыцыі і рады, што можам спяваць па-беларуску, — заяўляе салістка „Знічкі” Дар’я Маркевіч.

— У нашай школе вывучаем беларускую мову і таму наш калектыў павінен спяваць на роднай мове і быць візітнай картачкай школы, — кажа Каміля Чурак.

— На пачатку дзейнасці калектыву падбірала я рэпертуар, які быў мне даступны, напрыклад, са спеўнікаў. Магчымасці акампанементу тады таксама былі абмежаваныя і мы карысталіся толькі „арганкамі”, — гаворыць мастацкі кіраўнік „Знічкі” і заадно настаўніца музыкі Бажэна Ляўчук, якая на працягу пятнаццаці гадоў кіруе дзейнасцю калектыву. Закончыўшы эстраднае аддзяленне Універсітэта культуры ў Мінску (раней вучылася ў Бельскім белліцэі) (...)