Ніва № 32 (2621), 6 жніўня 2006 г.
Студзіводы вучаць насАляксей МАРОЗМнога цікавага пра жыццё ў мінулым маглі даведацца і навучыцца даўнім мясцовым заняткам вучні падставовых школ і гімназісты ў час майстар-класа „Канікулы з традыцыяй”, які з 17 па 30 ліпеня ладзіла аб’яднанне „Музей малой айчыны ў Студзіводах”. У выпадку малодшых дзетак многія заняткі перапляталіся з гульнямі і песнямі, што спрычынялася да большага зацікаўлення вучняў мясцовай культурай і традыцыямі. Гімназісты таксама пазнаёміліся з мясцовым фальклорам, а тканне ці вышыванне надоўга застанецца ім у памяці. Калі я заходжу на музейны панадворак у Студзіводах, дзеткі пад наглядам Марыі Красоўскай з Бельска канчаюць вышываць кветкі і іншыя простыя матывы. — Дзеткі хутка зразумелі, як трэба вышываць крыжыкам і стараліся закончыць работу адно перад другім. Падабрала я нескладаныя матывы, бо гэта ж вучоба, — кажа Марыя Красоўская. — Мяне вышываць навучыла маці, якая добра ведала гэты занятак. Некаторыя вышываныя вырабы я перадала ў Студзіводскі музей. Побач маёй субяседніцы працуе Марыя Панасюк. Вучыць яна выконваць кветкі з тонкай каляровай паперы. — Дзеткі цікавяцца маёй работай і ахвотна робяць кветкі, — гаворыць Марыя Панасюк. Работа пераплятаецца з пытаннямі вучняў, якім спадарыня Марыя тлумачыць як трэба працаваць. Гэты занятак вельмі спадабаўся дзяўчаткам і Максіму Фіёніку, які працуе са старэйшымі за сябе дзеткамі. На іх заўвагі, на польскай мове, адказвае ён па-свойму. (...) |