Як быць чалавекам

Раіна СТЭФАНЧУК

Пяцігадовы універсітэт у Тэрэмісках у канцы будучага акадэмічнага года выпусціць першы курс. Цяпер дванаццаць маладых людзей з усяе Польшчы займаецца на дзённых занятках на першым курсе ў былой драўлянай і адрамантаванай школе. Чарговыя курсы вучацца ў Варшаве-Ваўры. Там заняткі праводзяцца ў доме, дзе змяшчаецца таксама Фонд Яцка Кураня; раней тут была яго кватэра. Павел і Кацярына Вінярскія заснавалі школу разам з Данутай Курань. Было гэта ажыццяўленне ідэі хворага ўжо тады Яцка Кураня. У лісце кандыдатам, бацькам, настаўнікам і грамадскім дзеячам Данута Курань, старшыня Управы Адукацыйнага фонду яе мужа напісала: „Паўшэхны універсітэт імя Яна Юзафа Ліпскага ў Тэрэмісках ствараюць людзі, якія паставілі перад сабой заданне знайсці адказ на пытанне як жыць, якім быць чалавекам — а гэта пытанне аб культуру, аб міжчалавечыя адносіны”.

— Яцэк Курань меў моцны ўплыў на кшталт гэтай школы. Заснавальнікі абапіраліся між іншым на ідэях народных універсітэтаў, — расказвае Дарота, адна з каардынатарак рэалізаваных тут праектаў.

На адной з універсітэцкіх сцен вісяць здымкі Яцка Кураня. Пры адной з іх — камінок. На ім выпісана на лістку: „Пераходзь спакойна праз гоман і спех, і памятай, які супакой можна знайсці ў цішыні”. Побач аўдыторыя з камп’ютэрамі, малая бібліятэка-пакой ціхай навукі. На спецыяльнай табліцы распіска цыклічных заняткаў (...)