Студэнцкія дні культуры

Міра ЛУКША

Воля прыехала ў Беласток з групай студэнтаў. Пра тыя студэнцкія „ночы” ведае з досведу — арыштавалі яе за ўдзел у дэманстрацыі, адседзела сваю „паложаную” колькасць сутак на Акрэсціна. У той час яе калегі з курса падыходзілі да залікаў перад абаронай дыплома. Цяпер яна — былая студэнтка пятага курса матэматыкі БДУ. У наступным годзе хоча аднавіцца якраз там, у сябе, хоць тут прапанавалі ёй працяг студыяў. А з Беларусі прыехалі на дні культуры гурт „Неўра Дзюбель” (пратрымалі яго на мяжы ў Кузніцы; за той час, калі чакаўся ён у „Фаме”, дала чаду гарадоцкая „РІМА” ў першы, рокавы вечар). Гучны рок і ў выкананні Ілоны Карпюк разам з „5set5” прыцягнуў не толькі маладых беларусаў і палякаў. У кавярні было відаць групкі і сямейныя, і з неюнацкімі ўжо персонамі, менш ці больш вядомымі з беларускай нівы. Для іх студэнцкія музычныя дні былі, як заўжды, нагодай і да ўспамінаў, і да сустрэч адных з аднымі. Іх больш было нават на „цішэйшым” акустычным вечары ў наступны дзень, у суботу, дзе з бардаўскай песняй пад гітару выступіў Алег Кабзар, а таксама Ілона Карпюк з Андрэем Грэсем і Марцінам Кахановічам ды Змітро Язвінскі, які сам адзін моцна трымаў гонар гурту „Рагіс”.

Адкуль ідэя і грошы на мерапрыемства? Арганізавалі і падтрымлівалі імпрэзу БАС, Беластоцкі асяродак культуры, Вышэйшая школа публічнай адміністрацыі, студэнцкі парламент універсітэта ў Беластоку, студэнцкі самаўрад Філалагічнага факультэта, „Ніва” і прэзідэнт горада Беластока (Ілона: „Мы добра жывем з горадам!”). Ілона (...)