Яшчэ пра яўрэяў Беласточчыны

Марк ЦЫБАРТ

Ва ўсходняй частцы рэгіёна найбольш яўрэяў жыло ў Орлі (3 000 жыхароў і „амаль усе — яўрэі”), Сямятычах (4 200 яўрэяў на 7 800 усяго насельніцтва), Бельску-Падляшскім (38% яўрэяў на 8 000 насельніцтва) і Свіслачы (2 100 яўрэяў на 4 000 жыхароў). Але самы цікавы матэрыял пра гэтую нацыянальную меншасць змяшчаецца пры апісанні „шматлюдна наведванага лецішча” Мілейчычы, у якім на агульную колькасць 2 085 пастаянных жыхароў, яўрэяў было „толькі” 894 душ.

А вось што чытаем у даваенным даведніку: „Адно з самых вялікіх лецішчаў у паўднёвай частцы Беластоцкага ваяводства. Прысутнасць дачнікаў, пераважна яўрэяў, у апошніх гадах даходзіла да 1 500 чалавек за сезон з розных гарадоў, пераважна з Беластока, Бельска, Ваўкавыска і Сямятыч, часткова нават з Варшавы і Седльцаў. Для прыёму дачнікаў у суседнім лесе ўзнікла больш за 20 вілаў і пансіёнаў — разам больш за 200 пакояў. Кошт найму пакояў у сярэднім складае ад 25 да 30 злотых у месяц без абслугі і пасцелі. Летняй парой дзейнічаюць тут тры пансіёны — Хаіма Стрыкоўскага, Ізаака Розенцвага і Янкеля Сакалоўскага — у якіх можна таксама атрымаць абеды і вячэры. Апрача таго ў 1936 годзе былі тут дачныя вілы Зэльмана Сехана, Швейны Ойшпетэра, Бейлы Шымановіч, Шамкі Плотніцкага, Добы Байзнер і Шымана (...)