Першая сустрэча Буйнюка

Ірэна ІГНАТОВІЧ

Гайнаўка прывітала госця светлымі праменнямі сонейка, невялікім марозам і подыхам доўгачаканай вясны. Госць — Юрка Буйнюк — выявіў, што гэта яго першая аўтарская сустрэча і адтуль хваляванне.

Сустрэча адбылася ў чытальным зале школьнай бібліятэкі. Удзел прынялі вучаніцы і адзін вучань другіх класаў ліцэя, настаўнік беларускай мовы Ян Карчэўскі і настаўнікі-бібліятэкары: І. Ігнатовіч і Г. Іванюк. Крыху збянтэжаны Ю. Буйнюк у першай частцы сустрэчы зачытаў свае вершы. Гэта былі вершы са зборніка „Субота ў Малінніках”, з іншых зборнікаў, а таксама творы яшчэ не друкаваныя і зусім свежанькія з апошніх тыдняў.

Публіка — дзяўчаты ўслуханыя, зачараваныя. Хлопец малады, харошы, прыстойны, голасам аддае настрой твораў. Яго слухаецца добра.

Так мінуў адзін урок. Пасля перапынку час на пытанні і размову. Пытанняў было многа. Яны краналі і твораў, і самой асобы Буйнюка. На кожнае пытанне аўтар даваў вычарпальны адказ і таму можна было ад яго многа чаго даведацца і навучыцца. Галоўная інспірацыя яму прыходзіць тады, калі адчувае сябе самотным. Якраз слухачы вылавілі слова „самота”, якое часта паўтараецца ў творах. Юрка Буйнюк піша на беларускай мове, але таксама і на гаворцы. (...)