Наш бой за Тацяну Хому

Ганна КАНДРАЦЮК

24 лістапада яе адлічылі з універсітэта — як напісана ў афіцыйным камюніке — з-за „самавольнага і беспадстаўнага выезду ў Францыю і знаходжання ў гэтай краіне ад 11 да 14 лістапада 2005 года ў перыяд вучэбных заняткаў”.

Студэнты з 40 краін свету на працягу мінулых тыдняў сабралі больш за дзевяць тысяч подпісаў у падтрымку студэнткі. Найбольш, каля 2 тысяч подпісаў, сабралі ў Беластоку. Ініцыятарамі акцыі сталі сябры БАСу Радаслаў Дамброўскі, Нікан Шарамэта, Андрэй Курчук.

— Першая думка, якая прыйшла мне ў галаву, — кажа Радаслаў Дамброўскі, намеснік старшыні БАС, — што мы, студэнты, павінны нешта зрабіць! Ведаю асабіста Тацяну, яна дзейнічае ў ЗБС, рэдагуе сайт studenty.by на англійскай мове. Пасля таго, як яе абралі ў кіраўніцтва ESIB, мы паслалі віншаванні. Усе былі задаволены. Пасля на іх сайце чытаю, што яе выкінулі з універсітэта. Мы рашылі, што так не можа быць.

Нікан Шарамэта: — Тацяна разам з сяброўкамі дапамагала нам у арганізацыі „Басовішча” і мы мелі магчымасць бліжэйшага знаёмства. Пра студэнтаў з ЗБС можна сказаць толькі добрае. Яны лепш сарганізаваныя чым мы, думаюць па-еўрапейску. І гэта адборная, адукаваная кампанія. Яны не баяцца. (...)