Экуменія і ўзнагароды

Міра ЛУКША

Таварыства „Oikumene” зарэгістравана было ў 2000 г., аднак пачаткі экуменічнай дзейнасці значна ранейшыя. Сягаюць яны 1994 г., калі першы раз нарадзілася ідэя сарганізавання экуменічнага канцэрта ў час Тыдня малітваў за еднасць хрысціян пад уплывам закліку папы Яна Паўла ІІ „крышыць перашкоды і этнічныя, і культурныя, і рэлігійныя бар’еры”. Узнік тады „Грамадскі камітэт-ініцыятар экуменічнага канцэрта”, у які ўвашло некалькі асоб, а старшынёй яго стала Аляксандра Шавэла-Навацкая. Канцэрт адбыўся ў Беластоцкай філармоніі 6 сакавіка 1994 г. Меў ён на мэце з’яднанне людзей розных веравызнанняў і светапогляду. Музыка, паэзія і мастацтва аўтараў розных канфесій і рознага часу таксама ядналі штогадовыя экуменічныя сустрэчы. Таварыства, пашыраючы абсяг свае дзейнасці ў галіне практычнага экуменізму, арганізавала разам з Падляшскай бібліятэкай гістарычна-экуменічныя сустрэчы „Экуменізм у яднаючайся Еўропе”, разам з Беластоцкім універсітэтам — „Нашы суседзі — Украіна”, з Біблейскім таварыствам — прамоцыю новых перакладаў Святога Пісання, Біблейскія вечарыны. Супрацоўнічае з экуменічнымі цэнтрамі, удзельнічала ў сесіях Студыі праваслаўнай тэалогіі Варшаўскага універсітэта, Хрысціянскай тэалагічнай акадэміі, вяла карэспандэнцыю з Экуменічным інстытутам Каталіцкага люблінскага універсітэта. Члены таварыства (...)