Сустрэча беларусаў

Аляксей МАРОЗ

Дырэктар Гайнаўскага белліцэя Яўген Сачко пахваліў ідэю спатканняў з удзелам вучняў і настаўнікаў беларускіх ліцэяў. Вучні маюць нагоду пазнаёміцца між сабою, а настаўнікі — абмяняцца вопытам або проста паразмаўляць аб справах, якія іх турбуюць. Сёлетняя сустрэча была асаблівай, бо прынялі ў ёй удзел вядомыя пісьменнікі з Беларусі.

— Добра, што многа гадоў працягваецца сімбіёз беларускіх ліцэяў, якія павінны супрацоўнічаць між сабою. Маем нагоду спаткацца з элітай, якая стварае высакаякасную беларускую культуру, — заявіў старшыня Беларускага саюза ў РП Яўген Вапа, які вёў спатканне.

— Я, будучы вучнем Гайнаўскага белліцэя, не меў нагоды сустракацца з бельскімі белліцэістамі, бо ў мінулым не ладзілі такіх спатканняў, — сказаў старшыня беларускага Самаўрадавага форуму ў РП і вядомы ўжо гайнаўскі празаік Міхась Андрасюк. Звярнуў ён увагу на адмоўнае ўздзеянне польска-беларускай мяжы, якая праходзіць побач яго бацькоўскага дома, на жыццё насельніцтва, якое апынулася па абодвух баках граніцы. Сямейнікі, якія сталі жыць у суседніх дзяржавах, на многія гады перасталі з сабой сустракацца, а зараз прыгранічная зона пусцее...