Паддаць вецер у спіну

— Вялікім клопатам Польшчы з’яўляецца беспрацоўе. Як гэтая праблема выглядае ў Вашай гміне?

— Паводле апошніх вестак, яно ў нас меншае за 10%. Хто хоча працаваць, той, у прынцыпе, працу мае. Бар’ерам для працаўладкавання з’яўляюцца і нашы дзяржаўныя законы, якія ўстанавілі бар’ер спрошчанага справаводства на ліку 20 працаўнікоў. І ў нашай гміне ёсць фірмы, якія змаглі б прыняць больш на працу, але тады трэба ім уводзіць дадатковыя непрадукцыйныя штаты, а гэта ўжо ім не аплачваецца. Калі б гэты бар’ер падняць да пяцідзесяці, тады рушыла б уся Польшча.

Мы, з боку гміны, стараемся стварыць умовы для развіцця прадпрымальніцтва. Гэта выдзяленне ў плане прасторавага добраўпарадкавання ўчасткаў пад інвестыцыі, аснашчэнне будаўнічых участкаў водаправодамі, большых пасяленняў — каналізацыяй, стварэнне сеткі праязных дарог з цвёрдым насцілам, кансультацыя. І падаткі ў нас найменшыя ў павеце. Прадпрымальнік, які ў нас паставіць будынак для вытворчасці, на працягу трох гадоў плаціць толькі палову падатку. Бо калі мы яму паддамо вецер у спіну, то яму лягчэй стаць на ногі, а гміне пасля будзе ад гэтага даход.

Актыўнасць гміны залежыць ад арганізацыі працы ўправы, стаўлення да выклікаў, якія нясе жыццё. Мы маем тое шчасце, што наш персанал мае найвышэйшыя кваліфікацыі. Сёння вельмі важнай справай з’яўляецца здабыванне фінансавых сродкаў, а дзеля гэтага патрэбнае выдатнае веданне законаў, замежных моў і інфарматыкі. У гміне маем такую ўдарную групу з трох працаўнікоў, якая выходзіць насупраць выклікам будучыні, гэта наш ініцыятыўны рухавік. Мы ў ліку лідэраў у здабыванні еўрасаюзных сродкаў. Для прыкладу: калі Беласток на інвестыцыі здабыў 7 мільёнаў, то мы на каналізацыю — тры; гэта ў дваццаць разоў больш у пераліку на аднаго жыхара! Дзякуючы ўмеласці карыстацца еўрасаюзнымі сродкамі мы будуем у чатыры разы больш чым гміны парытэтныя з нашай. І не трэба нам падцягаць падаткаў, што аблягчае развіццё нашай гміны. З еўрафондаў пабудавалі мы ачышчальню сцёкаў у Нарве. Хочам сканалізаваць усю мясцовасць, гэта 13 кіламетраў галоўнага канала. І кожны жыхар Нарвы атрымае магчымасць перайсці з нужніка ў ванны пакой...