Шматкультурны еўрапеец

— Што схіліла Вас пачаць збіраць паштоўкі з выявамі старога Гродна?

— Гродна — горад, з якога выводзяцца сама меней тры пакаленні маёй сям’і. Мне цікава было ведаць як выглядала Гродна тады, калі жылі ў ім мой бацька, дзед і прадзед. Але ў мяне не было спецыяльнай ідэі як задаволіць сваю цікавасць. Нехта падказаў мне, што найлепшым спосабам будзе калекцыянаванне старых паштовак з выявамі колішняга горада. Пачаткова мне здавалася, што гэта лёгкае і таннае хобі, але аказалася яно даволі цяжкім і дарагім. Раптам пайшла мода на старыя паштоўкі, павялічыўся лік калекцыянераў. Часам цяжка купіць старыя адкрыткі, а рэдкія экземпляры шмат каштуюць.

— Ваша хобі цесна звязана з гісторыяй Вашай сям’і...

— Няшмат дакументаў захавалася з мінулага маіх продкаў, але ў мяне ёсць свая, можна сказаць галівудская, версія роду Варашыльскіх. Мяркую, што мая сям’я выводзіцца з вёскі Варашылы на Беласточчыне, якая існуе да сённяшняга дня. А можа гэта назва вёскі ўтварылася ад прозвішча маіх прашчураў? Гэта настолькі праўдападобная версія, што чарговыя сляды, доказы на яе пацвярджэнне знаходзіў я ўздоўж чыгуначнай лініі Беласток — Гродна: у Трырэчках, Дуброве-Беластоцкай і ў самім Гродне...