У Іркуцку — мы завадатары

— Колькі беларусаў у Іркуцкай вобласці?

— Іркуцкая вобласць займае такую тэрыторыю як Украіна, Беларусь, Прыбалтыка і яшчэ частка Фінляндыі разам, але жыхароў усяго тры мільёны. У час апошняга перапісу насельніцтва беларусамі, сведама, назвала сябе шаснаццаць тысяч чалавек.

— Адкуль там такая вялікая грамада?

— Большасць гэта нашчадкі перасяленцаў часоў сталыпінскай рэформы. Яны ўжо нарадзіліся як праўнукі і прапраўнукі і звычайна запісваюць сябе рускімі. Але ў іх ёсць гаворка, яны размаўляюць на добрай трасянцы, як у самой Беларусі.

— З якіх яны рэгіёнаў?

— З усіх. Ёсць у нас перасяленцы з Гродзенскай вобласці, з Брэстчыны, Гомельшчыны, ёсць перасяленцы з Віцебшчыны, з Магілёўшчыны, з Беласточчыны, нават беларусы са Смаленска і Бранска.

— Якія ў вас арганізацыі?

— 31 траўня 1996 года мы правялі свой першы з’езд беларусаў Іркуцкай вобласці. Зацвердзілі наш статут, сваю эмблему, — на ёй Байкал, Ян Чэрскі — наш знакаміты даследчык, які быў сасланы пасля паўстання 1863 года. Наша эмблема чытаецца так: мы жывём на тэрыторыі Прыбайкалля, але шануем традыцыі і сімвалы нашых продкаў, бел-чырвона-белы сцяг у тым ліку. І працуем на карысць Бацькаўшчыны — як рабіў гэта Ян Чэрскі.

31 траўня, кожны год, мы адзначаем свой дзень народзінаў. І калі раней мы ладзілі нейкае мерапрыемства, то цяпер мы ладзім Тыдзень беларускай культуры. Прытым кожны дзень ладзім нейкае мерапрыемства...