Б’юць нашых

Мацей ХАЛАДОЎСКІ

У канцы ліпеня дзевяць юнакоў пасля дваццаткі — частка праваслаўных, частка католікаў, як гэта бывае ў іх родных Мілейчычах — выбралася адпачыць у асяродак „Партнёр” у Сэрпэліцах над Бугам. Мясцовасць гэтую на інтэрнэт-старонках называюць „Перлай Падляшша”. Пасля змроку частка хлопцаў пакінула асяродак у пошуках дыскатэкі. Калі вярталіся, каля брамы ў асяродак заатакавала іх трох накачаных мужыкоў больш-менш іх узросту. З голымі торсамі і бейсбольнымі палкамі зачапілі праходзячых.

— Штосьці там гаварылі, хто мы такія, адкуль, — расказвае адзін з удзельнікаў экскурсіі ў Сэрпэліцы. — І пачалі нас шарпаць, біць бейсбольнымі палкамі і рукамі. Адзін прыклаў нашаму сябру да жывата пісталет. Мы пабеглі ў бок нашага доміка. Тады стралялі па нас некалькі разоў.

З доміка юнакі пазванілі па скорую дапамогу. Адзін з хлопцаў трапіў у бальніцу ў вельмі цяжкім стане, з сур’ёзным пашкоджаннем галавы. Іншаму зламалі руку і выбілі зубы. Толькі калі на месцы здарэння паявілася паліцыя, а скорая забрала найбольш пацярпелых, адзін з хлопцаў заўважыў, што куля чархнула за ягоны бок.

— Мы папрасілі ў паліцыянтаў нейкіх бінтоў. А яны кінулі нам пагардліва кавалак марлі, — успамінае брат хлопца адвезенага ў шпіталь з траўмай галавы, таксама ўдзельнік экскурсіі.

Разбойнік — паліцыянт?

На месцы здарэння паявілася двух паліцыянтаў у форме і двух мужчын у цывільным. Прыехалі яны разам.

— Цывільныя не хацелі прад’явіць дакументаў. Наш калега распазнаў у адным з паліцыянтаў у цывільным чалавека, які прыкладаў яму ружжо да жывата. Тады запытаўся: „Дык што, цяпер таксама пачнеш да мяне страляць?!” — расказваюць пацярпеўшыя.

Як кажуць, якраз тыя цывільныя дапытвалі іх у асяродку апдачынку адразу пасля здарэння. Хлопцы не скрываюць, што мелі ў крыві крыху больш за адзін проміль алкаголю (два, тры півы). Але на іх просьбу цывільныя паліцыянты не хацелі паддацца праверцы алкаматам. Што цікава, паліцыя забяспечыла сляды і шукала гільзаў толькі праз некалькі дзён.

Сёння ўсю дзевятку цяжка намовіць да дэталёвых прызнанняў. У Мілейчычах, Сэрпэліцах і Лосіцах гавораць, што разбойнікі павязаны з сядлецкай мафіяй. Кажуць, што займалі яны адзін з домікаў у „Партнёры” раней. На тэрыторыі гэтага адпачынковага асяродка некалькі гадоў раней былі забіты два мужчыны. Да гэтай пары, аднак, асяродак не мае ніякай аховы, апрача агароджы і форткі, якая зачыняецца на засаўку.

Этнічная нянавісць?

Справу ахутвае аўра сакрэтнасці. Пацярпеўшыя не скрываюць, што Павятовая камендатура ў Лосіцах хоча ўсю справу замяць, бо, мабыць, страляў да іх яе функцыянер.

— Не было прымянення зброі і ўдзелу ў інцыдэнце паліцыянта! — гарантуе „Ніве” намеснік павятовага каменданта ў Лосіцах Вальдэмар Заневіч.

Раней, аднак, прэс-інфарматар тае камендатуры Кшыштаф Ляшук у размове з „Glosem Siemiatycz” заявіў:

— Не маем выказвання эксперта ў гэтай справе, таму цяжка адказаць на гэта на 100 працэнтаў. Аднак, на некалькі дзесяткаў можна сцвердзіць, што да аднаго з пацярпеўшых хтосьці страляў і ў яго агнястрэльная рана.

Канчаткова пацвердзілі гэта лекары, якія пісьмова апісалі рану, разам з дыяметрам дула пісталета, з якога была выстрэлена куля.

Доктар Францішак Яшук, ардынатар аддзела хірургіі шпіталя ў Лосіцах быў таксама таямнічы, калі справа датычыць юнака, якому ў інцыдэнце пашкодзілі чэрап і які больш за дзесяць дзён ляжаў без памяці:

— Быў прывезены да нас малады чалавек з вельмі цяжкай траўмай чэрапа.

— Ці гэта была механічная траўма? — дапытваліся мы.

— Больш інфармацый ад мяне не атрымаеце.

Адзін з лекараў хірургічнага аддзела ў Сямятычах, дзе цяпер ляжыць пабіты, засцярог:

— Сям’я не жадае, каб падаваць інфармацыю аб ім.

— Гэта мне зусім невядома, — кажа брат пацярпеўшага.

Ядвіга Турута, кіраўнічка асяродка „Партнёр”:

— Не будзе ніякіх інфармацый. Дзякую, — і адкладвае трубку.

У „Ніву” прыйшла ў гэтай справе ананімка. Хтосьці спраўны ў законе звярнуўся да міністра ўнутраных спраў і Галоўнай камендатуры Паліцыі з патрабаваннем пачаць унутраны працэс і адстараніць паліцыянтаў з Лосіц ад гэтай справы, паколькі ёсць падазрэнне, што былі яны з ёю звязаныя. Што больш, аўтар ананімкі заяўляе: „Злачынства было ўчынена на фоне этнічнай нянавісці”. На яго думку, падставай да нападу было тое, што маладыя людзі слухалі запісаў беларускіх, польскіх, рускіх і ўкраінскіх гуртоў.

— Мы ніякай музыкі не слухалі. Не было ў нас нават плэераў, — тлумачыць брат хлопца з траўмай галавы.

Пацярпеўшыя атрымалі ліст з Павятовай камендатуры ў Лосіцах, што... вядзе яна папярэдняе следства пад наглядам пракуратуры ў Седльцах.

Самі гэта высвятляць?

Тым часам у Мілейчычах амаль усе жыхары вельмі ўзбударажаны гэтай справай. У мясцовым бары паставілі банку на грошы для хлопца, які ўсё прабывае ў бальніцы з траўмай галавы (ужо ён прытомны). Будуць грошы яму патрэбныя на працяглую рэабілітацыю. Ляжаць у банцы нават 100-златовыя купюры, і гэта ўжо не першая скарбонка.

— Пройдзе яшчэ два, тры тыдні, дык нават той наш калега не зможа адназначна пазнаць бандыта, што прыкладаў яму пісталет да жывата, — мяркуюць хлопцы.

Сам ранены пазбягае размоў з журналістамі.

— Яны ведаюць нашы адрасы, прозвішчы. А калі гэта сапраўды мафія, да таго павязаная з паліцыяй?.. — тлумачыцца адзін з яго калег.

Тым часам у Галоўнай камендатуры Паліцыі сказалі нам, што будзе далей з заявай ананімнага інфарматара:

— Як кожная справа такога тыпу, і яна трапіць у рукі адпаведнаму органу. У гэтым выпадку зоймецца ёю Павятовая камендатура ў Лосіцах пад наглядам Ваяводскай камендатуры ў Радаме і пры ўдзеле пракуратуры ў Седльцах.