Бандароўская гасцёўня

Віктар БУРА

Першым з прывітальнай прамовай выступіў войт Міхалоўскай гміны Марк Назарка, які падкрэсліў значэнне фэсту ў жыцці мясцовага насельніцтва. Старшыня ГП БГКТ Ян Сычэўскі ў сваю чаргу адзначыў, што — як правіла — фэсты ладзяцца там, дзе ёсць адпаведнае асяроддзе, калектывы, арганізатары і падтрымка мясцовых улад. Тое, што фэст у Бандарах мае ўжо 5-гадовую традыцыю, гэта самы лепшы доказ, што ён мясцоваму грамадству проста неабходны. Гэтую думку пацвердзіла солтыс вёскі Бандары Ніна Лукша, якая сказала, што жыхары навакольных вёсак рыхтуюцца да гэтага свята цэлы год.

Канцэрт пачаўся з выступлення хору „Крыніца”, апранутага ў прыгожыя народныя касцюмы. Затым вядучыя — сакратар ГП БГКТ Валянціна Ласкевіч і загадчыца Міхалоўскага цэнтра культуры, спорту і адпачынку Малгажата Кнот — запрашалі на сцэну чарговыя калектывы: мясцовыя „Ток-Арт”, „Крэс”, „Сінгерс” і дуэт „Госька і Кшысь”, беластоцкі гурт „Зорка” ды гасцей з Беларусі — ансамблі „Грымата” і „Медуніца”. Загучалі песні на беларускай мове, шчырыя, непаўторныя, глыбока кранаючыя душу — галасы мінуўшчыны і сучаснасці...