Ніва № 27 (2564), 3 ліпеня 2005 г.
Свята беларускай культурыМіра ЛУКШАПачаўся чарговы летні сезон мерапрыемстваў-фэстаў, арганізаваных Беларускім грамадска-культурным таварыствам, якія амаль штотыдзень будуць праводзіцца па ўсёй Беласточчыне. Гэта святы беларускай культуры, перш за ўсё — песні, так як першае, беластоцкае, ХХ Свята беларускай культуры, якое на пагорак Магдаліны пасярод Беластока прыцягнула больш за тры тысячы гарачых прыхільнікаў роднай песні, што шчыльна запоўнілі лавы амфітэатра.У гэты раз аматары беларускай песні ў выкананні тутэйшых і рэспубліканскіх мастакоў спеваў больш чым заўсёды цікавіліся іншымі вырабамі культуры — і рукадзелля ўтворанага рукамі (са скуры, саломы, сена, драўніны...), і кнігай. Не змяншаліся, як заўсёды, чэргі перад машынамі, адкуль прадавалі свае касеты „Зорка” і „Прымакі”, але слухачы не шкадавалі часу пастаяць перад сталамі, на якіх расклалі свае кнігі Янка Заброцкі з Цэнтра славянскай культуры ў Варшаве, які штогод і на ўсе фэсты прывозіць беларускія і праваслаўныя выданні, а таксама аўтары з Беларускага літаратурнага аб’яднання — старшыня „Белавежы” Ян Чыквін, Міра Лукша і Віктар Швед. Асабліва кнігі шаноўнага паэта-юбіляра карысталіся агромным зацікаўленнем, што бывалага не на адной такой сустрэчы плённага аўтара аж дзівіла. Мабыць, попыт на друкаванае роднае слова ці не ад надвор’я залежыць...
|