Візантыйскія вартасці

Аляксандр ВЯРБІЦКІ

Нядаўна экстранным Усеправаслаўным саборам у Стамбуле быў скінуты з пасады Іерусалімскі патрыярх Ірыней. Галоўнай прычынай для гэтага рашэння быў скандал са здачай у 198-гадовую арэнду палесцінскай зямлі ізраільскім бізнесменам; некаторыя СМІ называюць і суму, якая пасля гэтай здзелкі з’явілася на асабістым рахунку ўладыкі. (Уласнасцю патрыярхата з’яўляецца звыш 17% грунтаў у Іерусаліме; на адным з такіх участкаў стаіць Кнесет). Гэтай здачы нельга было ўжо сцярпець, бо і раней патрыярх адзначыўся рэдкім мастацтвам перасварвання ўсіх з усімі, а ў асабістых кантактах з іншавернымі іерархамі карыстаўся прыёмамі, якія найчасцей можна аглядаць на хакейных матчах, адно з тою розніцай, што ў Іерусаліме схваткі суправаджаліся выклікамі ізраільскай паліцыі. Пікантнасці справе дадае і ягонае прызнанне, што сваю пасаду купіў ён за грошы грэчаскага гандляра наркотыкамі Вавіліса. Такім чынам тэзіс класіка, што рэлігія з’яўляецца опіумам для мас, знайшоў свой нечаканы практычны доказ.

У каго Вавіліс купіў вярхоўнейшы чын? Кандыдата на трон іерусалімскага патрыярха мусяць адобрыць улады Грэцыі, Ізраіля, Палесціны і Іарданіі, а прапануе яго Грэчаская царква. У пачатку гэтага года на прыцэл былі ўзяты мітрапаліт Аттыкі Панцеляймон і афінскі архімандрыт Іакаў, блізкія супрацоўнікі першаіерарха Хрыстадула. Абвінавацілі іх у хадайніцтвах за вызваленне ад судовай адказнасці гандляроў наркотыкамі; такія там хрысціянскія вартасці. Панцеляймон скінуты з кафедры і цяпер яго справу разглядае свецкі суд. Іншыя чыны таксама трапілі пад абстрэл грэчаскіх СМІ не толькі за фінансавыя махлярствы, але і за не надта кананічныя полавыя схільнасці; гэтыя заганы не абмяжоўваюцца толькі да Грэцыі...