Заклік дзеля будучыні

Мацей ХАЛАДОЎСКІ

У дварку Сапліцова на акраіне Белавежы па ініцыятыве Еўрапейскай нацыянальнай партыі — Еўрапейскіх дэмакратаў (прысутнай у Еўрапарламенце) ды Грамадзянскай платформы (з яе ліку і падляшскай еўрадэпутаткі Барбары Кудрыцкай) прайшоў двухдзённы семінар „Палітыка ЕС у адносінах да Беларусі — выклікі для будучыні”. Яе асноўным момантам было падпісанне „Белавежскай дэкларацыі”. Яе аўтары патрабуюць у кіраўнічых органаў ЕС паслядоўнага ізалявання дыктатарскай улады Аляксандра Лукашэнкі на міжнароднай арэне пры „паралельным супрацоўніцтве з беларускім народам”. Далей заклікаюць яны да пашырэння ізаляцыі ўсіх рэжымных чыноў, адказных за парушанне грамадзянскіх правоў і вольнасцей. Падпісанты дэкларацыі паказваюць на патрэбу забароны ім уезду на еўрасаюзную тэрыторыю і блакіравання іхніх банкаўскіх рахункаў ды заклікаюць да абнародавання прозвішчаў рэпрэсаваных асоб ды выяўлення свету прозвішчаў канкрэтных чыноўнікаў адказных за рэпрэсіі з перакрыццём ім і іхнім сем’ям доступу да еўрапейскіх турыстычных, адукацыйных і стыпендыйных рэсурсаў. Патрабуюць яны стварэння незалежнай сеткі тэле- і радыёстанцый, вяшчаючых на Беларусь з Літвы, Польшчы і Украіны, устанаўлення Еўрапейскага фонду дэмакратыі, сродкі якога перадаваліся б незалежным партыям і грамадзянскім арганізацыям ды апрацоўкі еўрапейскай праграмы фінансавай падтрымкі акадэмічных цэнтраў у ЕС і на Украіне, якія адукавалі б і падтрымлівалі б беларускіх студэнтаў, настаўнікаў і даследчыкаў. Да народаў і прэзідэнта Расіі накіраваны быў заклік адмяніць афіцыйнае прызнанне аўтарытарнага рэжыму Лукашэнкі і далучыцца да палітыкі яго ізаляцыі...