Яднае іх царкоўная музыка.

— З 24 па 29 мая ў Беластоцкай філармоніі будзе адбывацца ХХІV Міжнародны фестываль царкоўнай музыкі арганізаваны Фондам „Царкоўная музыка”. Як будзе праходзіць мерапрыемства?

— Традыцыйна адкрыем гэты Фестываль урачыстым інаўгурацыйным канцэртам, у якім пачуем канцэртную версію Літургіі св. Іаана Златавуста з музыкай Пятра Чайкоўскага (як прыклад укладу вялікіх кампазітараў Усходу ў духоўную і мастацкую спадчыну Вялікага княства Літоўскага — часткі Рэчы Паспалітай многіх народаў). Як сімвал выканаюць гэты канцэрт два знакамітыя хоры, нашы лаўрэаты — літоўскі хор „Brevis” з Вільні пад кіраўніцтвам Гінтаўтаса Венісловаса і польскі хор „Bel Canto” з Ольштына, пад кіраўніцтвам выдатнага нашага земляка, бяльшчаніна Янкі Палавянюка. Музыка да літургіі кампазіцыі Чайкоўскага будзе ўпершыню поўнасцю выконвацца ў Польшчы. Робім гэта ў 165 гадавіну з дня нараджэння гэтага вялікага музыканта. У сёлетнім фестывалі звернем таксама ўвагу на юбілей эстонскага кампазітара Арво Парта, а перад усім на юбілей аднаго з выдатнейшых польскіх кампазітараў Рамуальда Твардоўскага, звязанага з фестывалем ад 23 гадоў, які ў гэтым годзе святкуе 75-годдзе з дня нараджэння. У час фестывалю будуць выкананы амаль усе яго вакальныя творы царкоўнай музыкі створаныя для хору. У дадатковым канцэрце арганізаваным 28 мая (у суботу) пачуем інструментальныя і інструментальна-вакальныя творы інспіраваныя царкоўнай музыкай, а сярод іх „Малую праваслаўную літургію” створаную ў 60-х гадах на хор і аркестр, якую выканаюць хор „Cantica Cantamus” пад кіраўніцтвам Віялеты Бялецкай, разам з сімфанічным аркестрам Беластоцкай філармоніі і ўдзелам польскага славутага баса Леанарда Анджэя Мроза. Канцэрт павядзе славуты дырыжор Сілезскай філармоніі Міраслаў Яцэк Блашчык. Традыцыйна беластоцкай і прыезджай публіцы прадставім многія аматарскія і прафесійныя, свецкія і царкоўныя хоры, у ліку якіх будуць прадстаўнікі сямі праваслаўных цэркваў. Спадзяемся выступленняў 29 хораў з 15 краін свету...