На радзіме Стэфана Баторыя

Пётр АМБРАСОВІЧ

Адзначу толькі, што Стэфан Баторый — венгерскага паходжання — валодаў лацінскай, італьянскай і нямецкай мовамі (па-польску размаўляць не навучыўся). Да свайго каралявання быў князем Трансільваніі (Сяміграддзя). Трансільванія ў часы Баторыя была асобнай дзяржавай, побач з Венгрыяй, але залежала ад Турцыі.

У Шымлеў-Сільванію я трапіў позна вечарам і шчырая падзяка супрацоўнікам мясцовай бальніцы, якія дапамаглі мне на самым пачатку акрыяць і зарыентавацца ў незнаёмым месцы пасля працяглага падарожжа. Наступны дзень быў прысвечаны знаёмству з гарадком і пошукамі замка Баторыяў — мэты майго падарожжа.

Горад Шымлеў-Сільванія знаходзіцца ў 29 кіламетрах на паўночны-захад ад горада Залэў (Zalau) — цэнтра павета Селаж (Salaj). Займае ён паверхню 62,26 км², знаходзіцца ў нізіне Шымлеў, сярод Карпацкіх гор. У гістарычных крыніцах упершыню горад успомнены ў 1251 годзе.

Археалагічныя адкрыцці на тэрыторыі гарадка паказваюць на існаванне там у старажытнасці цывілізацыі дакаў. За Шымлеў знойдзены былі два скарбы залатых манет ад V стагоддзя. Яны экспануюцца ў гістарычных музеях Вены і Будапешта. На адным з пагоркаў ля Шымлеў знаходзіўся вельмі старадаўні замак дакаў. Хацелася ўбачыць яго парэшткі, быў недзе паблізу яго, але ўжо цемнавата ды і час быў абмежаваны, так што самы гістарычны помнік убачыць не ўдалося...