Ніва № 11 (2548), 13 сакавіка 2005 г.

Адпачываюць і лечацца

Аляксей МАРОЗ

Штораз больш жыхароў Гайнаўкі і навакольных вёсак прыязджаць на масажы і рэабілітацыйныя працэдуры з прымяненнем сучасных прылад да Яўгеніі Навіцкай з Арэшкава. Яе кабінет наведваюць жадаючыя пахудзець і аслабіць напружанне ад стрэсу. Большасць турыстаў, якія наведваюць агратурыстычную кватэру спадарства Яўгеніі і Анатоля Навіцкіх, таксама карыстаецца масажамі. Польскія і замежныя госці цікавяцца Белавежскай пушчай, беларускай культурай і праваслаўным веравызнаннем.

— Да змены прафесіі прымусіла мяне хвароба, — кажа Яўгенія Навіцкая, якая раней працавала настаўнікам-бібліятэкарам у Падставовай школе ў Арэшкаве. У 2000 годзе яна закончыла Школу рэабілітацыі і масажу і ў наступным годзе адчыніла кабінет. Спачатку яе рэабілітацыйнымі паслугамі зацікавіліся жыхары Гайнаўкі. Пасля на масажы пачалі прыязджаць жыхары вёсак, пакутуючыя ад болю ў пазваночніку.

— Найбольш мяне цешыць, калі бачу рэзультаты сваёй работы. Я вельмі радуюся, калі пасля серыі масажаў у маіх пацыентаў папраўляецца здароўе. Старэйшая сялянка, якая доўгі час ляжала ў ложку пасля траўмы, прыняла 20 масажаў і стала хадзіць па хаце з палкай. Іншыя асобы, якім трэба было б доўгі час лячыць хваробы пазваночніка, маглі вяртацца да працы ўжо пасля масажаў, — гаворыць спадарыня Яўгенія. — Тых хворых, якім цяжка перамяшчацца, я наведваю дома. Калі ім здароўе папраўляецца, прыязджаюць да мяне ў кабінет. Аднак яшчэ цяжка пераканаць вяскоўцаў да лячэння з прымяненнем масажаў...

(...)