Поўная зала палітыкаў

Міра ЛУКША

Сапраўды, фестываль здаўся вялікамаштабным святам, на якім выступілі прафесіяналы і аматары, якіх выступленняў не пасароміліся б сцэны большых метраполій. Знакамітыя „Васілёчкі”, „Маланка”, сталыя „Цаглінкі”, „Арэшкі”, хор Гайнаўскага дома культуры, „Крыніца”, „Расспяваны Гарадок”, маладзенькія „Каласкі” ды гайнаўская „Знічка”, магутныя „Куранты”, вярнуўшыся „Белы сон”, натуральныя і высокамастацкія Люба Гаўрылюк і Ала Каменская, Марыя Хіліманюк, ды зноўку моладзь — „Лучына”, „Art Pronar Big Band” (з Нарвы), „Прымакі”, „Лідэр”... З аднаго боку можна сказаць — знаёмыя ўсе твары, вядомыя амаль усе песні, але, гледзячы на публіку, відаць, што азываюцца тыя нашы песні ў іх душах, што словы ведаюць нават і дзеці.

Накрунула найбольш слухачоў Анжаліка Агурбаш (Ліка Ялінская), якая выступіла на фестывалі па дарозе ў свет (назаўтра мела быць у Ізраілі), прадстаўніца Беларусі ў наступным Еўрабачанні. І на сцэне, і на прэс-канферэнцыі выступіла яна як беларуская гарачая патрыётка, якая прадстаўляе радзіму. Анжаліка, „апошняя каралева прыгажосці СССР”, цяпер найпрыгажэйшая жонка Расіі (выйшла замуж за рускага грэка Міколу Агурбаша), маці траіх дзяцей (наймалодшаму — паўгода), разлічвае на галасы ў конкурсе Еўрабачання ўсіх тых, для каго яе песні будуць голасам душы. Гродзенскае тэлебачанне, якое прыбыло на беластоцкі фестываль беларускай песні, у асобе ўпарта расійскай журналісткі распытвала пяснярку па-руску, а тая прыгожа, беспамылкова і не менш упарта адказвала па-беларуску. Проста, не выпадала ёй іначай. Дарэчы, мелася ўражанне, што „легальным журналістам” з РБ беластоцкае свята здалося нейкім дзівам. І энтузіязм слухачоў, і кнігі раскладзеныя на століках, і ўвогуле прысутнасць нейкіх беларусаў у Польшчы...

Канцэрт удастоілі маршалак Сейма РП (патрон фестывалю) Владзімеж Цімашэвіч, міністр культуры РП Вальдэмар Дамброўскі, міністр культуры РБ Леанід Гуляка, віцэ-міністр замежных спраў РБ Аляксандр Міхневіч, паслы РБ у РП Павел Латушка ды РП у РБ Тадэуш Пяўляк, сенатар Сяргей Плева, дэпутаты Яўген Чыквін, Генавефа Вісьнёўская, Барбара Цірук, Аляксандр Чуж, ваявода Марэк Стшалінскі, віцэ-ваявода Ежы Паўяновіч, падляшскі маршалак Януш Кшыжэўскі, старшыня Сейміка Збігнеў Кшывіцкі, консулы РБ і РП, прадстаўнікі міністэрстваў, урадаў, самаўрадаў усіх ступеняў, духоўныя асобы на чале з епіскапам Іакавам. Зачытваліся прывітальныя лісты м.інш. ад беларускага ўрада, „Радзімы”, ліст ад мітрапаліта Савы, які назваў фестываль беларускай песні святам спакою і любові ды спаслаў на ўсіх удзельнікаў Божае блаславенства.