Ніва № 49 (2534), 5 снежня 2004 г.

Юбіляры ў новых строях

Віталь ЛУБА

У пятніцу, 19 лістапада, Бельскі дом культуры запоўніўся паклоннікамі хору „Васілёчкі”, якія адзначалі саракагадовы юбілей. У госці да юбіляраў прыехалі прадстаўнікі міністэрскіх, ваяводскіх і мясцовых улад ды калектывы „Цаглінкі” з Ляўкова і „Зорка” з Беластока. Вядучая канцэрт сакратар ГП БГКТ Валянціна Ласкевіч, якая калісьці сама спявала ў хоры, у перапынках паміж паасобнымі нумарамі праграмы расказала публіцы гісторыю калектыву.

Калі пасля першай часткі канцэрта „Васілёчкі” сышлі са сцэны, публіку забаўлялі калектывы „Цаглінкі” і „Зорка”. Другі ўваход калектыву на эстраду прыцягнуў увагу гледачоў новымі строямі і песняй „Васілёчак — сіні цвет” музычнага кіраўніка хору Мікалая Мяжэннага, спецыяльна напісаную да юбілею. Новыя касцюмы гэта таксама юбілейны падарунак Міністэрства культуры (10 тыс. зл.), бурмістра Бельска-Падляшскага (8,5 тыс. зл.) і Беларускага грамадска-культурнага таварыства (8,5 тыс. зл.). Строі былі заказаны ў Мінску. Тэрміноваму іх выкананню пасадзейнічаў пасол РБ Павел Латушка, а асабіста прывёз іх у Бельск консул Вадзім Палякоў.

З нагоды юбілею хору і паасобным спевакам былі прысвоены ўзнагароды. За заслугі ў прапагандаванні фальклору Падляшша Залаты крыж заслугі атрымала Ірына Астапчук, а Сярэбраны — Ніна Бялецкая і Галена Пашкоўская. Медалі ўручыў віцэ-ваявода Ежы Паўяновіч...

(...)