Ніва № 49 (2534), 5 снежня 2004 г.

Трохгалоссе Кабацаў

У лістападзе ў Асяродку прапагандавання рэгіёна ў Гайнаўцы Мікола Бушко і яго супрацоўнікі арганізавалі спатканне з Яўгенам Кабатцам, аўтарам перакладаў на польскую мову беларускіх твораў „Людзі на балоце” Івана Мележа, „Трэцяя ракета” Васіля Быкава і апавяданняў Янкі Брыля. Размова з госцем была наладжана ў рамках „Творчага трохгалосся Кабацаў”. Бацька Яўгена Кабатца выводзіцца з Беглюкоў, распаложаных побач Нараўкі. Там узрасталі дваюрадныя браты літаратара і перакладчыка — гайнаўскі мастак Віктар Кабац і беластоцкі архітэктар, праектант цэркваў Ян Кабац. Арганізатары мерапрыемства рашыліся наладзіць сустрэчы з трыма братамі Кабацамі.

— Беласточчына знаходзіцца на скрыжаванні паміж візантыйскім усходам і міжземнамор’ем. Тут ствараецца еўрапейская культура, якая з’яўляецца часткай сусветнай культуры, — заявіў Яўген Кабатц, які спаслаўся на карані сваёй сям’і. Да 16 гадоў, разам з бацькамі, жыў ён у Ваўкавыску. Прыязджаў у родныя Беглюкі, Нараўку, Гайнаўку і Белавежскую пушчу. У 1946 годзе ў час рэпатрыяцыі пераехаў жыць на захад Польшчы. Пасля працаваў у Італіі, як аташэ па справах культуры і навукі. Паколькі выводзіўся ён з праваслаўнай сям’і, шукаў візантыйскіх каранёў у італьянскай гісторыі і культуры. Свае досведы апісаў у кніжках аб Італіі. Яшчэ на пачатку спаткання госць растлумачыў адкуль у яго прозвішчы ўзялася літара „т”. Калі пайшоў ён вучыцца ў школу, нямецкі настаўнік напісаў яму ў канцы прозвішча літары „tz”, якія пасля палякі перамянілі на „tc”...

(...)