Ніва № 46 (2531), 14 лістапада 2004 г.

У гасцях у „Белавежы”

Міра ЛУКША

На чарговым семінары Беларускага літаратурнага аб’яднання „Белавежа”, які вёўся ў гасціннай залцы бібліятэкі Усходнеславянскай філалогіі Універсітэта ў Беластоку ў апошнюю суботу кастрычніка сустрэліся нашы беларускія пісьменнікі, філолагі і запрошаны госць — старшыня Саюза пісьменнікаў Беларусі Алесь Пашкевіч. Калісьці такія семінары, часцейшыя, нагода да сустрэчы, абмену думкамі, новымі творамі, былі таксама своеасаблівай пісьменніцкай школкай перш за ўсё для маладых творцаў. На сустрэчы наймаладзейшым удзельнікам быў студэнт беларускай філалогіі Юрка Буйнюк, які свае першыя спробы дасылаў быў у „Зорку”, сваю першую газету. Цешыць вельмі і тое, што і „старыя зубры” ў змозе, у добрым здароўі ды творчым настроі дабрыць на белавежскія сходы, як „бацька” нашага найстарэйшага ў краіне літзгуртавання — Георгій Валкавыцкі (ён жа і Юрка Зубрыцкі), надалей плённы, а можа якраз цяпер мае нагоду і сам напісаць ды надрукаваць сваё, і пасабляе іншым, і пад аднымі вокладкамі збірае найлепшае, што друкавалася ў нашых тутэйшых выданнях (сабраў ужо паэтычны „Букет Белавежжа”, празатарскае „Панароўе”, склаў да друку — выйдзе сёлета — сатырычны апавядальны зборнік „Ракам у Еўропу”...

(...)