Ніва № 39 (2524), 26 верасня 2004 г.

Фэст на „Дзікім Захадзе”

Міхал МІНЦЭВІЧ

У нядзелю, 29 жніўня, у Вульцы-Выганоўскай адбыўся народны фэст (такі самы днём раней быў у Орлі) ды спаборніцтвы пажарнікаў. У мастацкай частцы выступілі: калектывы з Маліннік, Краснага Сяла, „Вечарынка” з Беларусі ды „Арляне” і маладыя „Арлянскія званочкі” з Орлі. У святкаваннях прысутнічала некалькі соцень асоб з суседніх вёсак.

Напачатак, каля 14-й гадзіны, настаяцель Валянскага прыхода пасвяціў машыну „Жук”, якую атрымалі мясцовыя пажарнікі, падкрэсліўшы, што гэта добрае падмацаванне, але было б лепш, каб пажараў зусім не было. 12 пажарнікаў-дабравольцаў з рук намесніка павятовага каменданта Яна Шкоды атрымалі адзнакі. Солтыс вёскі Юрка Васілеўскі, Аляксей Старчэўскі і Мікалай Беляк атрымалі залатыя медалі, сем чалавек — сярэбраныя, а дваіх маладых — Міхал Голец і Рыгор Васілеўскі — адзнакі ўзорнага пажарніка.

У пажарных спаборніцтвах удзельнічалі пяць каманд з ліку сямі, якія дзейнічаюць у Арлянскай гміне. З году ў год расце колькасць пажараў і небяспечных здарэнняў на дарогах Бельшчыны, таму пажарнікам трэба пастаянна практыкавацца. Дзеля гэтага і мэтай валянскіх спаборніцтваў было мабілізаванне пажарнікаў-дабравольцаў да інтэнсіўнага засвойвання ведаў, патрэбных для змагання з агнём, ды папулярызацыя супрацьпажарнай тэматыкі сярод насельніцтва. Перамаглі пажарнікі з Орлі перад калегамі з Рыгораўцаў, Вулькі-Выганоўскай, Маліннік і Спічкоў...

(...)