Браніслаў Эпімах-Шыпіла

Лена ГЛАГОЎСКАЯ

Беларусь у гэтым годзе святкуе падвойныя ўгодкі Браніслава Эпімаха-Шыпілы, таксама і 70-я ўгодкі смерці яго ў Ленінградзе 6 чэрвеня 1934 г. Карыстаючы нагодай падвойных угодкаў хачу распавесці чытачам „Нівы” пра цікавую знаходку ў Гданьску. Пару гадоў таму назад у Гданьску пры рэкламным шуме СМІ адкрываўся французамі гіпермаркет „Auchan”. У „Glosie Wybrzeza” наконт новай інвестыцыі выказвалася Катажына Эпімах-Шыпіла. Менавіта гэтае прозвішча — пададзенае тоўстым шрыфтам — прыцягнула маю ўвагу. Пазваніла я ў гіпермаркет пытаючыся пра кантакт са спадарыняй Эпімах-Шыпілай. Фірма, абараняючы свае інтарэсы, не надта ахвотна пагадзілася даць ейны тэлефон. Трэба было даказаць, што званю ў сямейных, а не ў фірменных інтарэсах. Атрымала я нумар мабільнага тэлефона. З размовы з Катажынай Эпімах-Шыпілай аказалася, што яна з’яўляецца пляменніцай прафесара Браніслава Эпімаха-Шыпілы і захоўвае як рэліквію ягоны здымак, падораны яе дзядулю Вацлаву і бабулі Эміліі. Здымак дастаўся ёй у спадчыну пасля смерці бацькі, Часлава Эпімаха-Шыпілы...

(...)