Ніва № 37 (2522), 12 верасня 2004 г.

Гарадок святкуе

Міра ЛУКША

Традыцыяй ужо стала святкаванне „дня нараджэння” места Гарадок. І хоць Гарадок сёння — ужо нават, мабыць, і не мястэчка, а гмінная немалая вёска, з ледзь пазначаным месцам па замку Хадкевічаў, дзе нават і штотыднёвы базар страціў местачковую важнасць і шумнасць, але аб Гарадку і ў Гарадку зусім не ціха. Ледзь адгрымела „Басовішча”, ледзь астыла паляна ва ўрочышчы Барык пасля апошняй „Сяброўскай бяседы”, як у Гарадок паплылі новыя госці. Сваякі, суседзі, замежнікі, а нават і зноўку багатая чарада чыноўнікаў. Былі, а як жа ж, і з ваяводства — сам ваявода Марэк Стшалінскі ўзвышаўся над гэтым тлумам ураднікаў і самаўраднікаў. Нагода была святочная і прыемная — у гэты сонечны дзень, у 506-годдзе Гарадка, пачаў сваю дзейнасць амфітэатр над Зарэчанскім вадасховішчам. Азерца чыстае, атачэнне яго травяніста-падстрыжанае, ёсць месца дзе і раскласціся на пледах, і паставіць свой столік, а на агароджаным абшырным пляцы — лавачкі і будыначак сцэны. Тут зараз жа і лясок. Мабыць, гасцей было не менш ці не больш, чым на святах арганізаваных у Барыку...

(...)