Ніва № 34 (2519), 22 жніўня 2004 г.

Вярнуўся на родную зямлю

Ада ЧАЧУГА

З князем Астапам Сапегам (так, сказаў ён, называлі яго на Беларусі: не Яўстафій, а Астап) мы сустрэліся і доўга размаўлялі ў верасні 2000 года ў Беластоку, і нехта мог бы засумнявацца ў праўдзівасці слоў чалавека, які з Беларуссю развітаўся шмат дзесяткаў гадоў таму, а больш за пяцьдзесят гадоў пражыў у Афрыцы.

Але калі мы развітваліся, у яго голасе было столькі настальгіі, што мне самой стала смутна. Я жадаю 84-гадоваму князю аптымістычнага настрою, моцнага здароўя і добрага паветра ў Кеніі, а ён уздыхае ды кажа: „Добрае паветра, яно тут...”.

Князь Яўстафій (Астап) Сапега гэта нашчадак ружанскай лініі славутага магнацкага роду Сапегаў на Беларусі, другога па значэнні пасля Радзівілаў. Яго продкі ў Вялікім княстве Літоўскім займалі найвышэйшыя дзяржаўна-адміністрацыйныя і ваенныя пасады.

Князь Астап пераконваў мяне, што першыя Сапегі не выводзіліся з полацкіх баяраў, а паходзілі з-пад Мінска, а княжацкі тытул атрымалі толькі ў 1700 годзе. Дарэчы, у канцы XVI — пачатку XVII стагоддзяў перайшлі з праваслаўя і кальвінізму ў каталіцтва...

(...)