Бяднейшым — менш

Аляксей МАРОЗ

У Белавежы маршалкам не ўдалося атрымаць ад прэм’ера абяцання змены спосабу падзелу еўрасаюзных сродкаў. Самаўрадаўцы з бяднейшых і слабанаселеных рэгіёнаў, у тым ліку з Падляшша, адчуваюць сябе пакрыўджанымі. Прынятыя паказчыкі падзелу структурных сродкаў з Еўрасаюза на бліжэйшыя тры гады даюць большыя магчымасці шчыльней населеным рэгіёнам. Толькі 10% еўрасаюзных сродкаў трапіць у бяднейшыя рэгіёны. Змена спосабу размеркавання сродкаў будзе магчымая толькі ў 2007 годзе.

— Покі ўвойдзем у Еўрасаюз, мы хацелі б увайсці ў Польшчу, — такімі словамі падляшскі маршалак Януш Кшыжэўскі пакрытыкаваў спосаб размеркавання еўрасаюзных дапаможных сродкаў для рэгіёнаў. — Будзем змагацца, каб не толькі колькасць жыхароў вырашала аб велічыні сродкаў, але каб звяртаць увагу на валавы нацыянальны прадукт у паасобных рэгіёнах. Лічым, што прэм’ер будзе нашым саюзнікам.

Маршалкі пераконвалі прэм’ера да яснага раздзялення кампетэнцый паміж урадавыя і самаўрадавыя органы. Паводле маршалкаў, ваяводы павінны займацца юрыдычным кантролем і ўпраўленнем у крызісных умовах. Рэальная ўлада павінна быць у ваяводскіх самаўрадах. Прэм’ер заявіў, што не будзе вяртання да цэнтралізацыі ўлады і ў будучыні самаўрады будуць мець штораз большыя кампетэнцыі.

— Гэта па ініцыятыве ўрада ў Сейме з’явіўся праект пастановы, якая перадае многія кампетэнцыі, фонды і маёмасць ад ваяводаў у самаўрады ваяводстваў, — сказаў прэм’ер Марэк Бэлька. Дадаў ён, што ў некаторых міністэрствах, між іншым у Міністэрстве гаспадаркі, паявіліся спробы пашырыць кампетэнцыі ваяводаў і цэнтральнай адміністрацыі, але ўрадам будуць яны абмяжоўвацца.

Прэм’ер пахваліў польскіх татараў за іх патрыятызм у адносінах да Польшчы. Не ўспомніў беларусаў або іншых нацыянальных меншасцей пражываючых на Падляшшы. Многа пытанняў журналістаў тычылася прапановы прызначэння Анджэя Ананіча на пасаду кіраўніка Агенцтва разведкі, якая выклікала пратэст з боку СЛД.

— Не кожная мая намінацыя выклікае энтузіязм паасобных палітычных груповак і я падрыхтаваны да гэтага, — сказаў прэм’ер Марэк Бэлька. — Гэта не абазначае вайны з СЛД. Спецыяльнымі службамі павінны кіраваць асобы, якія не з’яўляюцца членамі, супрацоўнікамі ці работнікамі спецслужбаў. Павінны быць гэта людзі звонку, але кампетэнтныя. Кіраўнік Агенцтва разведкі павінен быць асобай замежных службаў або прынамсі чалавекам, які ведае праблемы замежнай палітыкі. Такой асобай з’яўляецца амбасадар Ананіч.

Стараста Гайнаўскага павета Уладзімір Пятрочук падзякаваў прэм’еру за выдзяленне 400 тысяч злотых для пацярпелых ад буры ў Елянцы і Кляшчэлях і ўручыў яму невялікую статую зубра — сімвал удзячнасці жыхароў пушчанскага павета.