Ніва № 31 (2516), 1 жніўня 2004 г.

Юбілейнае „Басовішча”

Татка СТЭП

ХV-ае юбілейнае „Басовішча” прайшло пад знакам цяжкай рок-музыкі, добрага надвор’я і якасных арганізацыйных рашэнняў. Мас-медыі паведамлялі, што папярэдняя інфармацыйная цішыня пра сёлетні фестываль абазначае або кепскае, або нечаканае. Многія выказваліся, што планы арганізатара наконт адсутнасці польскай зоркі, увядзенне свабоднай сцэны, камерцыялізацыя ў якасці вялікіх медыяльных спонсараў кепска паўплываюць на адзіны ў свеце фэст беларускага рока. Сёння ўжо ведаем, што ўсе спекуляцыі былі памылковымі. Да хібаў сёлетняга „Басовішча” трэба залічыць кепскую інфармацыйную акцыю яшчэ да фестывалю. Здзіўляюць таксама сваркі і ўнутраныя прэтэнзіі саміх басаўцаў да сябе, якія прэзентаваліся на адкрытых інтэрнэт-форумах. Беларускі бок непрыхільна аднёсся да думкі, каб гурты ў конкурсную частку адбіралі Слава Корань („Уліс”) і Аляксандр Крывашэеў („Памідор-офф”) на аснове дасланых матэрыялаў, а не, як гэта бывала раней, у час адборачных канцэртаў. Да таго, як паведамлялі крыніцы з Беларусі, інфармацыя пра адбор на „Басовішча-2004” не трапілі далей як за Мінск і гурты з іншых гарадоў па гэтай прычыне не змаглі даслаць сваіх заявак. Усё астатняе ўдалося амаль ідэальна. Канцэрты пачаліся ў пятніцу 23 ліпеня з адкрытай сцэны — новаўвядзення фестывалю, якое ў задуме дазваляе выступіць гуртам вартым увагі гледача, але якія па прычынах мовы ці прэзентаванай музыкі не кваліфікуюцца ў конкурсную частку. Як сказала Ілона Карпюк (галоўны арганізатар „Басовішча”), адкрытая сцэна ставіць таксама сабе за мэту разварушыць публіку яшчэ да афіцыйнага адкрыцця фестывалю. Так яно і адбылося. Выступіла 6 гуртоў: тры з Польшчы і тры з Беларусі — „Black Sugar” (Беларусь — By), „C.R.A.C.K.” (Польшча — Pl), „In Extremis” (By), „The Jitters” (By), „Drapped Feld” (Pl) i „New Passengers” (Pl). На жаль, узровень адкрытай сцэны быў даволі нізкі. У 20 гадзін пачаліся выступленні запрошаных гасцей. Першым выступіў гурт „Індыга”, які год таму заваяваў аж дзве ўзнагароды. Пасля госці з горада Аструда — гурт „Triquetra”, які прадставіў свой новы матэрыял. Ужо вядома што „Triquetra” збіраецца пісаць альбом на беларускай мове. „Triquetra”, таксама як і чарговы госць — гурт „Сцяна” былі адным з пераможцаў мінулагодняга „Басовішча”. Апошнім пераможцам „Басовішча-2003” быў гурт „Без Назвы”. Усе яны прадставілі амаль гадзінны матэрыял і даказалі, што год часу, які прайшоў ад мінулагодняга фестывалю, быў вельмі працавіты. Апошнім у пятніцу выступіў гурт „Неўра Дубэль”. Было гэта прафесійнае шоу, хаця, як некаторыя ўважаюць, на 50 працэнтаў магчымасцей гурту. Праблема ў тым, што не ўсе музыкі даехалі на канцэрт.

Чарговай зменай гэтага года быў конкурс, які адбыўся ў суботу. Выступіла дзевяць камандаў — сем з Беларусі і дзве з Польшцы. Па спіску выступілі: „Тэзаўрус” (By), „Пульс Вакол” (By), „5 set 5” (Pl), „Taxi” (By), „Аніма” (By), „Cor Set” (By), „Сонцаварот” (By), „Тарпач” (By), „HPM” (Pl). Аказваецца, Беласточчына перажывае вялікі крызіс у пытанні маладых беларускіх рокменаў. Толькі адзін гурт „ад нас” заявіў ахвоту выступаць на сёлетнім конкурсе — гэта гарадоцкі „5 set 5”. Пасля малога перапынку на сцэне з’явіліся рэп-рокавы „ІQ-48” з вельмі гумарыстычнай ды прыемнай вуху праграмай, доўгачаканы на сцэне „Басовішча” мінскі „Жыгімонт Ваза”, беластоцкі „Hope On”, які не вельмі падышоў публіцы. Вялікае шоу распачалося ўсё ж такі ў час праграм гуртоў „Памідор-офф” і блюз-рокавай „Крамы”. Толькі пасля „Крамы” недзе ў дзесяць гадзін вечара надышоў час на аб’яўленне вынікаў конкурсу. Журы ў складзе: Слава Корань („Уліс”), Макс Івашын (прадзюсер, музыка), Лёнік Тарасэвіч (мастак) ды Ілона Карпюк (старшыня БАС) вырашылі, што ўзнагароды Беларускага аб’яднання студэнтаў і Радыё Беласток (80 гадзін запісу на Студыі Рэмбрандт) атрымае гурт „Тарпач” з Мінска. Узнагароду Беларускага саюза ў Рэчы Паспалітай журы аддало варшаўскаму гурту „HPM”. Прыз войта Гарадоцкай гміны атрымаў гурт „Сонцаварот” з Мінска, Радыё „Палёнія” сваю ўзнагароду прызначыла гурту „Тахі”, а Радыё „Свабода” ўзнагароду „Музыка свабоды” прысвоіла гурту „Уліс”. Да таго спецыяльную ўзнагароду ад музычнай інтэрнэт-крамы „Аллегра” ў выглядзе электрычнай гітары атрымала гітарыстка „Тахі” — Насця. Дадаткова Алесь Памідораў і Макс Івашын асабіста ўручылі скрынку піва гурту „Пульс Вакол” з Мінска. Пасля пачаўся канцэрт зорак — беластоцкага „Zero-85”, мінскай легенды беларускага рока гурту „Уліс”, які выступіў у новым складзе з, чаго яшчэ не здарылася ў гісторыі гурту, клавішнымі інструментамі. Пасля „Уліса” на сцэне з’явіўся чаканы ўсімі „НРМ”, які ўвёў гарадоцкую публіку ў татальны транс. „Judy 4”, паводле задумы арганізатара, выступіла ў якасці калыханкі да сну.

„Басовішча-2004” у гісторыю ўпішацца некалькімі з’явамі. Напэўна ўсе запамятаюць вялікі экран, на якім можна было сачыць за тым, што адбываецца на сцэне нават з боку палаткавага поля. Фестываль напэўна вартасна быў аформлены ў выглядзе гэтак званых гаджэтаў. У канцы канцоў з’явіліся „павадкі-смычы”, цікавыя майкі і характэрныя аранжавыя, шэра-белыя барвы. Аўтарам мастацкай часткі быў Юрка Асеннік з гурту „Zero-85”. Таксама з вялікай цікавасцю можна было сачыць за сапраўды якасным гукам. Шкада, што чарговага „Басовішча” трэба чакаць год часу.