Фестываль „пойдзе ўперад”

— Ужо другі раз арганізуеш „Басовішча”. Год таму ўсе згодна сказалі, што ўрэшце фестываль адбіўся ад дна. Які Твой рэцэпт на дасягненне прагрэсу?

— Я не думаю, што наступіў аж так вялікі прагрэс. Цешаць мяне станоўчыя ацэнкі. Зараз галоўнае пытанне: ці нам камерцыялізаваць „Басовішча”, ці ўсё ж такі надалей застацца пры апазіцыі да таго, што зараз чуем паўсюдна побач сябе. Гэта дазволіць нам абраць напрамак для чарговых „Басовішчаў”.

— Якая бліжэйшая будучыня ў фестывалю?

— Сёлетні фестываль будзе багаты на змены. Моцна працуем, каб павысіць яго музычны ўзровень. Конкурсная частка пакажа маладыя таленавітыя гурты. Трэба сказаць, што прыязджаючыя з-за мяжы зоркі здаўна затрымаліся на сваім узроўні і гэта адпавядае густам некаторых слухачоў, якія спецыяльна для іх прыязджаюць. Фестываль ужо ў гэтым годзе „пойдзе ўперад”.

— У якім сэнсе „пойдзе ўперад”?

— Трэба сказаць, што „расклад” застаецца падобным як дагэтуль. Зменай будзе тое, што конкурс маладых гуртоў адбудзецца ў суботу. Фестываль пачне „адкрытая сцэна”. Арганізуючы конкурс у суботу, мы вырашылі паказаць, што маладыя выступаюць не як дадатак да фестывалю, а толькі як адзінкі, якія акрэсліваюць характар і якасць „Басовішча”. Таму ўручэнне ўзнагарод адбудзецца ў самы важны момант фестывалю — у познія начныя гадзіны ў суботу. Сёлета вырашылі мы паставіць на візуалізацыю — ля сцэны з’явіцца адзін вялікі экран, а можа два. У Гарадоцкім доме культуры будуць дэманстравацца фільмы. У планах прафесійны дыджэй.

— Хочаце стварыць фестываль беларускай моладзевай культуры, не толькі музыкі?

— Вельмі нам хочацца, каб так было. „Басовішча” гэта не толькі канцэрт і шкада, што ў мінулым так літаральна было. Сённяшнія магчымасці шырокія і трэба імі карыстацца.

— Не забывайма таксама і пра другое жыццё фестывалю, гэтае па-за сцэнай...

— Вядома! Гэтае жыццё існавала і будзе надалей функцыянаваць. Адна дзяўчына мне сказала, што на „Басовішчы” музыка не да канца яе цікавіць, толькі назіранне за людзьмі. Яна штогод бачыць тыя самыя твары, што з’яўляецца доказам існавання групы верных мерапрыемству аматараў. Бачыла я таксама фільм Януша Гаўрылюка, на якім людзі гавораць, што прыязджаюць тут дзеля сустрэчы з людзьмі, з якімі раней пазнаёміліся на „Басовішчы”.

— Год таму вы здымалі фільм для архіва БАСу. Ці не думаеце зрабіць фільм пра „Басовішча” адрасаваны шырэйшай публіцы?

— „Басовішча” можна пабачыць на фільме „18”. Думаю гэты фільм паказаць сёлета, каб людзі маглі сябе пабачыць. Буду таксама вельмі рашуча гаварыць з Фондам маладога кіно, каб паспрабавалі зняць юбілейнае „Басовішча”. Важнай для нас з’яўляецца ідэя прэзентацыі архівальных відэазапісаў, якія мы сабралі і ператварылі ў лічбавы фармат.

— Афіцыйны назоў — Фестываль музыкі Маладой Беларусі. „Басовішча” зараз рокавае. Ці не думаеш, што маладыя сёння ўжо не слухаюць рок-музыкі?

— Калі фестываль паўставаў, прэзентаваліся на ім розныя музычныя жанры. Была бардаўская песня, была аўтарская. Рок-музыка таксама была, напрыклад, „Уліс” — сапраўдны рок-гурт. Цяпер маладыя слухаюць гіп-гоп. На „Басовішчы” заўсёды прысутнічала рок-музыка і так павінна застацца. „Басовішча” даказвае, што сёння можна іграць рок з вялікай заангажаванасцю і многае дасягнуць. Прыклад — конкурсныя гурты. Сумна, што сёлета не заявілі ахвоты выступаць на конкурснай сцэне гурты з Падляшша. Заяву даслаў толькі гурт з Варшавы, вакалісткай якога выступае беларуска. Шкада, што ўсё ж такі „нашы” папсаваліся. Калісь у „Басовішчы” маладыя гурты бачылі нейкі шанц, што знойдзецца ім месца.

— Год таму Ты абяцала на юбілейным XV фестывалі сюрпрызы...

— Галоўнай неспадзеўкай няхай будзе факт адсутнасці польскага гурту-зоркі. Думаю, што фестываль абароніцца без дарагіх польскіх калектываў. Сёлета з польскага боку прэзентуем музычнае Падляшша. Завершаць фестываль у вельмі кліматны спосаб гурт „Judy-4” ды вясёлы беластоцкі гурт „Hope On”.

— Сёлета ўводзіце „адкрытую сцэну”. Што гэта?

— „Адкрытая сцэна” не абазначае, што выступіць зможа кожны, без якой-колечы селекцыі. Многа гуртоў не ў змозе выступаць на „Басовішчы” па розных прычынах: не гэты музычны жанр, мова небеларуская. Дастаткова, што гурт заявіць ахвоту выступіць і прадставіць нам сваю творчасць, а мы яму знойдзем месца на сцэне. На свабоднай сцэне чакаем гуртоў з Польшчы і Беларусі. Свабодная сцэна гэта таксама новы спосаб адкрыцця фестывалю і ўвядзення публікі ў „шаленства”.

— Дагэтуль „Басовішча” завяршалася роўна ў 2 або 3 гадзіны пасля поўначы. Сёлета таксама плануецца такое вострае выцішэнне?

— Не. Будзем выцішаць памалу, пры дапамозе прафесійных дыджэяў (можа з Беларусі) у пятніцу і гурту „Judy-4” у суботу.

— Сёлета будзе таксама традыцыйны конкурс. За якія ўзнагароды будуць змагацца гурты?

— Напэўна будуць гэта падобныя ўзнагароды як дагэтуль, хаця спісак узнагарод яшчэ не закончаны. Плануем таксама зрабіць іерархію ўзнагарод. Уводзім гран-пры — галоўную першую ўзнагароду.

— Усе шукаюць у „Басовішчы” палітычнага аспекту супраціву беларускім уладам. Як Ты ставішся да гэтага пытання?

— Праўду кажучы я тут выступаю як рамеснік гэтага фестывалю. Не вельмі мне хочацца будаваць ідэалагічныя аспекты. Вядома, што некаторыя гурты прыязджаюць, каб палітычна выказацца. І трэба заўважыць, што ахвота гуртоў дэманстраваць свае палітычныя думкі напэўна не прападзе. Тут ніякіх забарон і наказаў няма.

— Дзякуй за размову, жадаю добрага надвор’я!

— Дзякую.