Ганарыцца дасягненнямі

— Спадарыня Анна, Вы працуеце ў Еўрапейскай камісіі ў Бруселі, а балатуецеся ў Еўрапарламент з Вармінска-Мазурска-Падляшскай акругі. Якія Вашы сувязі з Падляшшам?

— Я нарадзілася і выхавалася ў Сямятычах, куды ў пачатку 1970-х гадоў перасяліліся мае бацькі. Але мае дзяды па бацьку жывуць у Ляўках, а па маме — мелі гаспадарку ў Саках. Такім чынам Бельшчына мне асабліва блізкая. Там знаходзяцца магілы маіх продкаў.

Маю свядомасць і ўражлівасць фармавалі мясцовая культура, звычаі, мова, прырода. Дом бабулі Нюры ў Ляўках асацыюецца мне з дзяцінствам, канікуламі, размовамі аб далёкім свеце пры кафляной печцы ды вісячым на сцяне ў кухні календары „Нівы”.

— Якім быў Ваш шлях у Брусель?

— Нялёгкі. Калі я, як дзевятнаццацігадовая выпускніца Агульнаадукацыйнага ліцэя ў Сямятычах, выходзіла з бацькоўскага дома ў невядомае, была я моцная сілай супольных прагулак па сенажацях з дзядамі Сяргеем і Мацеем, відам абсеяных палёў вакол Бельска, пахам свойскага хлеба, сена ў клуні і цвітучай вечарам мацыёлы...

(...)