Адрэзванне ад свету

Мацей ХАЛАДОЎСКІ

Яшчэ месяц назад віцэ-маршалак Падляшскай управы Ян Камінскі даваў пэўныя спадзяванні на тое, што ў другой палове года могуць быць прыдбаны грошы на ўтрыманне нерэнтабельных маршрутаў або на кампенсаванне Польскай дзяржаўнай чыгунцы коштаў іх эксплуатацыі. Нядаўна віцэ-маршалак Камінскі быў адхілены ад пасады. Аднак раней ад імя Падляшскай управы паспеў ён падпісаць з ПКП дамову, якая гарантавала чыгунцы грошы да 30 чэрвеня г.г.

— Спадзяемся, што пазней у нас будуць грошы. Усё паказвае на тое, што іх крынiцай будуць большыя падаткі ад фізічных (PIT) і юрыдычных асоб (CIT), — гаварыў ён.

Усё мела высветліцца да канца чэрвеня. На жаль, як сказаў нам Яраслаў Ідзькоўскі — дырэктар Дэпартамента інфраструктуры, эканомікі і аховы асяроддзя Падляшскай маршалкоўскай управы, тое, ці папярэднія калькуляцыі наконт паступленняў падаткаў ад PIT i CIT апраўдаюцца Міністэрству фінансаў, а затым і Падляшскай маршалкоўскай управе будзе вядома ў канцы ліпеня. Ці ў такой сітуацыі чыгуначны транспарт будзе часова адменены або ліквідаваны неадкладна пасля 30 чэрвеня?

— Цяжка сказаць, — кажа Чэслаў Суліма з Дырэкцыі рэгіянальных перавозаў ПКП у Беластоку.

— Спядзяюся, што пасля чэрвеня на пэўны час знойдзем нейкія грошы, зробім перастаноўкі ў бюджэце на карысць рэгіянальных пасажырскіх перавозаў, — тлумачыць дырэктар Ідзькоўскі.

А што будзе далей?

— Прагнозы на першае паўгоддзе паказвалі, што падаткі ад PIT i CIT будуць большыя. Цяпер, аднак, наглядаем зніжэнне паступленняў, — сцвярджае дырэктар Ідзькоўскі.

Паводле даных ПКП, найбольш нерэнтабельныя маршруты гэта Беласток — Чаромха і Беласток — Кузніца-Беластоцкая. Апошнім часам штораз больш гаворыцца аб неабходнасці адмены руху цягнікоў на лініі Гайнаўка — Чаромха — Варшава. Аднак дырэктар Суліма яшчэ не хоча размаўляць на гэтую тэму.

— Яшчэ зарана аб гэтым гаварыць. Трэба пачакаць на развіццё падзей.

З падлікаў Міністэрства фінансаў вынікае, што на ўтрыманне рэгіянальнай чыгункі ў Падляшскім ваяводстве патрабуецца 15 130 тыс. зл., а ў маштабе краіны — каля 538 млн. зл. Цікава, што ў мінулым годзе, калі на гэтую мэту грошы паступалі з цэнтральнага бюджэту, тое ж Міністэрства фінансаў падлічыла і перадало Падляшскаму ваяводству ўсяго 10 млн. зл.

Гайнаўскі віцэ-стараста Ежы Сірак — добрай думкі і запэўнівае, што павятовыя ўлады зробяць усё, каб утрымаць рух на шляху Гайнаўка — Чаромха — Варшава. Толькі, на жаль, улады староства могуць аказваць уплыў на кіраўніцтва чыгункі і ваяводскі самаўрад. Самі яны грошай на гэтую мэту не маюць. Віцэ-стараста ў размове з „Нівай” не скрываў, што разлічвае на пуск у ход у другой палове года абяцанага рэйкавага аўтобуса ў Чаромху, што, прынамсі ў нейкай меры, вырашыла б праблему на гэтым маршруце пасля ліквідацыі традыцыйных чыгуначных ліній. Іншая праблема — гэта таварны транспарт, перш за ўсё ў Семяноўку. На гэтай перагрузачнай станцыі з году ў год расце колькасць перагружваных тавараў. У мінулым годзе было іх мільён тон. Аднак ПКП хоча транспарт гэтых тавараў перакінуць на дарогі.

— Стан даязных дарог у Семяноўку фатальны, — прызнаецца Ежы Сірак.

Прытым дадае:

— Не веру, каб ПКП зрэфармавалася і выкарыстала свой шанс.

PS. У канцы мінулага тыдня дырэктар Ідзькоўскі сустрэўся з віцэ-прэм’ерам Ежы Гаўзнерам. З размовы вынікла, што першых падлікаў наконт паступленняў ад падаткаў можна спадзявацца ў пачатку жніўня. Такім чынам лёс нерэнтабельных пасажырскіх перавозаў залежыць ад добрай волі чыгункі.

* * *

Паводле раскладу руху ў Падляшскім ваяводстве курсіруюць 93 рэгіянальныя цягнікі, 16 — міжваяводскіх (прынамсі паміж трыма ваяводствамі) і 14 міжнародных. У параўнанні з мінулым годам гэта менш на 18 цягнікоў рэгіянальных і 6 міжваяводскіх.

Агулам суполка ПКП кожны дзень адпраўляе на пуці 4 тысячы цягнікоў — пасажырскіх, „Regio Plus” і скорых, з гэтага ліку 3 600 цягнікоў курсіруюць па рэгіянальных маршрутах і каля 360 — па міжваяводскіх.