Разнароднасць хораў

— Ужо трэці раз пад Вашым кіраўніцтвам будзе арганізавацца з 9 па 16 мая ў Свята-Троіцкім саборы ў Гайнаўцы фестываль царкоўнай музыкі. Што новага падрыхтавана на сёлетняе мерапрыемства?

— Сёлетні фестываль не будзе адрознівацца ад выпрацаванай у мінулых гадах мадэлі. Будзе праводзіцца конкурс хораў, якія выконваюць царкоўную музыку. Тое, што будзе вылучаць сёлетняе мерапрыемства, гэта вялікая колькасць хораў — 35 — і іх разнароднасць. Пакажуцца, блізкія нам прыхадскія вясковыя і гарадскія хоры, але будзе таксама прэзентацыя вялікіх прафесійных хораў. Сярод апошніх — Дзяржаўны хор Рэспублікі Беларусь імя Рыгора Шырмы, Хор Маскоўскага тэатра і аперэты „Масква”, Хор Універсітэта імя Тараса Шаўчэнкі „Дняпро” з Кіева. Побач праваслаўных хораў выступяць таксама каталіцкія, якія выконваюць царкоўную музыку, між іншым, Хор Каталіцкага Люблінскага універсітэта і Юнацка-мужчынскі хор „Pueri Consonantes” з Вроцлава. Цікавым будзе напэўна афрыканскі хор з Ганы „Кyerematen”, які спявае рэлігійную музыку.

— Са сказанага відаць, што сёлета выступіць больш неправаслаўных хораў.

— Гэта сведчыць, што царкоўнай музыкай цікавяцца розныя свецкія хоры. Цяжка гаварыць аб папулярнасці царкоўнай музыкі, але яе прыгажосць спрычыняецца да таго, што яе спяваюць і слухаюць. У час фестывалю будзем прэзентаваць высокія мастацкія вартасці царкоўнай музыкі і знаёміць з нашым рэгіёнам і праваслаўем людзей з усяго свету.

— З якіх краін выступяць замежныя хоры?

— Да нас прыслалі заяўкі ажно 14 хораў з Расіі і з іх ліку мы выбралі чатыры. З Беларусі таксама выступяць чатыры хоры, з Украіны — два і па адным хоры з Балгарыі, Румыніі, Фінляндыі і Ганы.

— У мінулым Вы звярталі ўвагу на згоднасць рэпертуару з царкоўнымі канонамі. Ці трэба было сёлета адкідаць творы, якія не трымаліся царкоўных канонаў?

— Хоры прысылалі нам заяўкі з запісанымі творамі. Мы іх праслухалі і не заўважылі большых памылак. Аднак узнікла небяспека, што могуць выступіць хоры з некананічных Цэркваў Украіны і Балгарыі і мы звярталі ўвагу на прыхадскія хоры з гэтых краін. Свецкія хоры таксама павінны трымацца царкоўных канонаў, якія не дазваляюць адвольна інтэрпрэтаваць прэзентаваную музыку.

— Якія мерапрыемствы будуць спадарожнічаць фестывалю?

— Члены конкурснай камісіі пасля прэзентацыі музыкі будуць сустракацца з дырыжорамі і працаваць з імі ў напрамку павышэння ўзроўню выступлення хораў. Будзем арганізаваць канцэрты ў прыходах, між іншым, у Гайнаўцы, Бельску і Варшаве. Плануем арганізаваць выстаўку цэркваў і літургічнага аблачэння.

— Арганізацыя міжнароднага фестывалю патрабуе шчодрых спонсараў. Якія ўстановы выдаткуюць найбольш сродкаў на арганізацыю мерапрыемства?

— Самымі вялікімі нашымі спонсарамі з’яўляюцца Маршалкоўская ўправа ў Беластоку, Павятовае староства ў Гайнаўцы, Гарадская ўправа ў Гайнаўцы і многія гмінныя самаўрады. Сярод прадпрыемстваў найбольш грошай перадалі нам управы Гайнаўскага аддзялення Дрэваапрацоўчага прадпрыемства „Фортэ” і суполка „Пронар” з Нарвы.

— А што з Міністэрствам культуры, якое ў мінулых гадах фінансавала арганізацыю фестывалю?

— Мы здзіўлены паводзінамі чыноўнікаў Міністэрства культуры. Падалі мы прашэнне ў міністэрства і спачатку атрымалі вусную даклярацыю фінансавай падтрымкі арганізаванага намі фестывалю. Аднак пасля не было ніякага адказу на наша прашэнне. Хаця звярталіся мы з запытамі ў міністэрства, не атрымалі ніякіх паясненняў.

— У мінулых гадах многа асоб дапамагала арганізаваць фестываль.

— Так, многа асоб ангажуецца ў арганізацыю нашага мерапрыемства, але будзем рады дапамогай новых асоб.

— Дзякую за размову.

Гутарыў Аляксей МАРОЗ