Ніва № 6 (2491), 8 лютага 2004 г.

kamunikat.net.iig.pl

Уладзімір ЛАПЦЭВІЧ

Час ад часу варта зазірнуць у бібліятэку, пасядзець у чытальнай зале, пахадзіць паміж стэлажоў з невядомымі да гэтай хвіліны кнігамі, пагартаць зацікавіўшыя цябе выданні. Падобныя пачуцці ўзнікаюць, калі зойдзеш на сайт з цікавай назвай „Камунікат”. Бо гэта беларуская Інтэрнэт-бібліятэка.

Уся гісторыя стварэння і існавання сайта пад адрасам kamunikat.net.iig.pl непарыўна звязана з Яраславам Іванюком, цяперашнім журналістам Польскага радыё Беласток. З нагоды нашага зацікаўлення ён згадзіўся распавесці аб сайце падрабязней:

— Гісторыя стварэння сайта „Камунікат” узыходзіць да часоў маёй працы ў беларускай службе Радыё Палёнія. Менавіта тады ў 2000 годзе ўзнік яго правобраз — неафіцыйны бюлетэнь гэтага самага радыё. Ён існаваў у папяровым выглядзе і змяшчаў тое, што праходзіла ў эфіры Палёніі. Пазней узнікла інтэрнэтная версія, якую я пачаў насычаць інфармацыяй аб так званых гістарычных сшытках, а затым і іншых беларускіх кніжках. Хачу адзначыць, што сайт з’явіўся не толькі маімі намаганнямі, але і пры актыўнай дапамозе сакратара рэдакцыі тыднёвіка „Ніва” Аляксандра Максімюка і маёй жонкі Дануты.

— Ці часта „Камунікат” змяняў свой выгляд і дзякуючы чаму адбываюцца яго абнаўленні?

— Двойчы сайт змяняў сваё аблічча. А абнаўляецца ён дзякуючы адпаведнаму стылю работы. Я звяртаюся да розных аўтараў, каб яны дасылалі свае выданні, часам яны дасылаюць па ўласнай ініцыятыве. Абнаўленне адбываецца даволі часта. Пры гэтам хачу адзначыць найбольш актыўных, з кім даводзіцца супрацоўнічаць: Беларускае гістарычнае таварыства, Літаб’яднанне „Белавежа”, Villa Sokrates, Беларускі інстытут навукі і мастацтва з Нью-Йорка, Архіў найноўшае гісторыі з Мінска.

— Што ў рабоце сайта выклікае ў цябе найбольшы гонар і чаго, на тваю думку, у ім пакуль не хапае?

— Ганаруся тым, што кожны дзень прыкладна 250 чалавек заходзіць на старонкі „Камунікату”, здабываючы для сябе неабходныя веды і інфармацыю аб беларускіх выданнях як даўніх, так і апошніх. А не хапае, лічу, той беларускай літаратуры, якая выдавалася ў Польшчы ў 1959-1989 гадах. Але тут праблема больш фінансавага, чым тэхнічнага плана.

Да ўсяго сказанага Яраславам Іванюком дадам, што „Камунікат” ёсць сапраўднай жамчужынай для тых, хто прагне ведаў аб беларускай даўніне і сучаснасці. Акрамя 250 кніг па гісторыі, мове, літаратуры, палітыцы і гэтак далей, карыстальнік можа адкрыць перад сабой старонкі разнастайных часопісаў. Некаторыя выданні можна выпісаць і мець іх ужо ў рэальнай хатняй бібліятэцы, а не толькі ў віртуальнай наяўнасці.