O! Srodek Kultury Bialoruskiej!

Наталля ГЕРАСІМЮК

Ну, Музей — гэта зразумела: экспанаты, доследы, навуковая праца, выстаўкі, экспазіцыі і г.д. А што ж з асяродкам? Якім ён павінен быць? Чым ён можа прыцягнуць і аб’яднаць беларусаў і не толькі? Гэтую праблему вырашаць нам, беларусам, і не абраным асобам, а ўсім разам, што называецца талакою.

Зразумела, што без большых праблемаў можна зрабіць Дом культуры. Няхай і беларускі, але гэта будзе толькі яшчэ адзін Дом культуры, якіх усюды пруд прудзі. Ды толькі людзі шмат гадоў чакалі не чарговага тыпавага Дома культуры, а чагосьці лепшага, цікавейшага, чаго больш нідзе ні ў каго няма.

Першапачатковая задума была такой — пабудаваць „ДОМ УСІХ БЕЛАРУСАЎ”. І каб быў ён адзіны і непаўторны, каб як у сваёй хаце сябе адчувалі і старыя, і малыя. Каб маглі ў ім знайсці сабе занятак па душы ўсе: і найвышэйшага палёту інтэлектуалы, і найпрасцейшыя звычайныя. І каб гэта быў не проста так сабе „Асяродак”, а каб нават па-польску гучала з годнасцю, здзіўленнем і захапленнем: „O! Srodek Kultury Bialoruskiej!!!”

Вось і настаў час усім вырашаць якім быць гэтаму „ДОМУ”. Таму і кірую два пытанні да ўсіх беларусаў, да ўсіх беларускіх суполак і арганізацый, да ўсіх каму неабыякавы лёс беларускай культуры і лёс Асяродка:

1. Якім вы бачыце Асяродак беларускай культуры ў Гайнаўцы?

2. Як вы бачыце сябе ў Асяродку беларускай культуры ў Гайнаўцы?

Запрашаем усіх да супрацоўніцтва. Будзем удзячны за кожную параду, падказку, падтрымку.

Наш адрас: 17-200 Hajnowka, ul. 3 Maja 42, Osrodek Kultury Bialoruskiej, e-mail: asiarodak@op.pl