Ах, баль, першы баль...

Паўліна ШАФРАН-АСТАШЭВІЧ

Ад нейкага часу стаднёўкі перасталі быць камернымі імпрэзамі, якія праводзяцца ў школах, аднак з традыцыяй белліцэй не парваў і баль адбудзецца 25 студзеня ў родных мурах, чым давольны самі вучні.

Падрыхтоўка пачалася ўжо пад канец лістапада, калі сустрэліся бацькі, якія вырашылі галоўныя справы, у тым ліку кошт імпрэзы (240 злотых ад пары). Але гэта не ўсё! Амаль усе мае суразмоўцы сцвердзілі, што сапраўднай праблемай з’яўляюцца іншыя выдаткі.

— Аплата за стаднёўку — гэта толькі вяршыня выдаткаў, — гаворыць Івона Пішчатоўская, вучаніца IV д класа. — Далічыць трэба сукенку, якой цана вагаецца ад 150 злотых, калі хтосьці заказвае туалет у краўчыхі, да 400 злотых з магазіна; боты да 200 зл., бялізна — а ў тым ліку неабходныя чырвоныя „стрынгі” і панчохі — 60 зл., візітная сумка — 80 зл., біжутэрыя — да 200 зл., цырульнік — 60 зл., макіяж — 50 зл., і неабходнае, амаль для кожнай з сучасных дзяўчат, некалькі візітаў у салярыі — 60 зл. Разам выходзіць 1 350 зл.

— А якія найноўшыя плыні ў стаднёўкавай модзе? Адказаць нялёгка! — сцвярджаюць вучаніцы IV б класа.

— Першынство сярод туалетаў трымаюць доўгія спадніцы, пераважна чорныя з гарсэтамі белага колеру, аднак часта паяўляецца бардовы колер, як і неспатыканы на такога тыпу імпрэзах ружовы і блакітны, — працягвае Анна Паўлючук. — З біжутэрыяй няма праблемаў, бо ад некалькіх гадоў на балях царыць срэбра, а яго цана — прыемлівая.

Баль не абыдзецца без візіту ў цырульніка. Гэты год будзе розніцца ад папярэдніх выглядам прычосак — наступіў адыход ад традыцыйных кокаў да свабодных, але артыстычных прычосак на распушчаных валасах. Мода не абмінула і ботаў, якія „абавязкова на высокай шпільцы з доўгім спічастым наском”, — хорам адказвалі мне дзяўчаты з IV б класа.

Так коратка маецца справа строяў і падрыхтоўкі да першага ў жыцці балю прыгажэйшай, бо жаночай паловы чацвёртакласнікаў. Кошт стаднёўкі змяняецца, калі датычыць маладых мужчын, але не да канца...

— Касцюм да 500 злотых, кашуля — 45 зл., — пералічваюць вучні IV д класа Тамаш Калішэвіч і Лукаш Барташук, — боты да 200 зл., гальштук — 20 зл., бялізна — 30 зл., цырульнік — 15 зл. Адным словам многа, бо 1 050 зл., а гэта не кожнаму па кішэні!

— Касцюмы, — гавораць далей хлопцы, — вядома, цёмныя, пераважна чорныя, бо інакш і не выпадае, аднак кашулі і гальштукі гэта ўжо асобная справа, бо тут можна фантазіраваць! Будуць і традыцыйныя белыя і бардовыя, блакітныя і крэмавыя, у кропкі і рыскі, а нават з выявамі жывёл, а ўсё ў залежнасці ад туалету партнёркі.

Каб стаднёўка прайшла беспраблемна, бацькі вымушаны выказацца заангажаванасцю і арганізацыйнымі здольнасцямі. Вядучая роля выпала Ніне Вайшковіч, члену бацькоўскага камітэта, якая сарганізавала не толькі музычнае афармленне балю, але задбала і аб гастранамічны бок мерапрыемства.

— Да танцаў будзе іграць беларускі гурт Лідэр” з Беластока, з якім будзе выступаць салістка, а кошт гэтага складзе 2 400 злотых, — пералічвае спадарыня Вайшковіч. — Пачаткова была гаворка аб дыск-жакеі, аднак, такога маштабу баль патрабуе, каб іграў гурт.

Стаднёўка ў школе прымушае прыняць адпаведныя меры па бяспецы гуляючых. Спакою, апрача бацькоў, будуць сцерагчы нанятыя на гэтую ноч ахоўнікі. Няма чаму дзівавацца, бо ў адным будынку будзе гуляць больш за трыста чалавек. Саміх вучняў будзе 150, да гэтага даходзяць партнёры, настаўнікі, бацькі і госці.

— З беларускіх акцэнтаў, — як паінфармаваў віцэ-дырэктар Белліцэя Андрэй Сцепанюк, — будзе традыцыйны паланез „Развітанне з Радзімай” Агінскага, чытанне „Пана Тадэвуша” Адама Міцкевіча ў перакладзе на беларускую мову і прамовы вучняў.

Дырэктар Андрэй Сцепанюк даў вучням свабоду ў падрыхтоўцы і ўпрыгожанні залаў. Ці запланаванае „школьнае пекла” з шаржамі настаўнікаў у агні сярод чэрцяў спадабаецца настаўнікам, пабачым пазней...

Стаднёўка гэта толькі адна цудоўная ноч. А што далей? Экзамен на атэстат сталасці і экзамены ў ВНУ краіны — гэта асноўныя планы чацвёртакласнікаў.