Як святкавалі беластачане

Ганна КАНДРАЦЮК

— Як святкуюць беластачане? — папыталі мы бацькоў школьнікаў:

Альжбета Врублеўская:

— На Куццю едзем у Дэніскі да цесцяў — Анны і Васіля Врублеўскіх. Куцця ў нас традыцыйная, святкуем у сямейным крузе. Пасля вячэры, часам, ідзем у царкву.

Першы дзень Руздва святкуем у маіх бацькоў, у Ірэны і Аляксандра Цішукоў у Райску. Сын Мар’юш ходзіць калядаваць разам з мясцовымі дзецьмі. Пасля абеду ідзем да маіх бабулі і дзеда.

— У Мар’юша ёсць прабабка і прадзед?

— Так, у Райску жывуць мая бабуля і дзед — Вольга і Мікалай Чэрвінскія, і заўсёды да іх заходзім.

— Колькі дзён святкуеце?

На трэці дзень вяртаемся ў Беласток і тут святкуем. Не ходзім на працу.

Міраслаў Рудчык:

— Паедзем да цесцяў — Анны і Мікалая Екацярынчыкаў у Бельск. Пасля вячэры ідзем у царкву (хаця не заўсёды выстойваем да канца). На першы дзень прыходзяць дзеці і наша дачка Наталька разам калядуе. Свята праводзім у сямейным крузе.

Дзеда Мароза ў нас не ведаюць, з падарункамі прыходзіць святы Мікалай.

Ірэна Стэльмашчук:

— Наша сям’я жыве ў Беластоку і на Куццю ідзем да маіх цесцяў Анны і Мікалая Стэльмашукоў. Калядную вячэру пачынаем малітвай і просвірай, пасля, за сталом спяваем калядкі. Сярод калядных страў на стале фаршыраваны карп. Спосаб ад маёй бабулі, якая калісьці працавала ў яўрэяў і адтуль рэцэпт. Пасля вячэры ідзем у царкву.

Святы ў нас экуменічныя, на другі дзень у госці прыходзіць сяброўка-каталічка (у якой мы былі на каталіцкія святы).

— А як святкуюць вашы дзеці — Ася, Пятрусь і Міхась?

— У нас ёсць гвязда, у мінулым годзе Ася хадзіла калядаваць.

— Калі ставіце ёлку?

— Вядома, на нашу Куццю.

Аліна Ваўранюк:

— Звычайна, Куццю спажываем у цесцяў, у Тыневічах, аднак у гэты раз едзем у Бельск да маіх бацькоў — Раісы і Сцяпана Бурылаў. Разам з намі будзе мая бабуля Люба. Застолле ў нас традыцыйнае, дванаццаць страў, месца для нечаканага госця. Пасля вячэры спяваем калядкі. На другі дзень свята паедзем да цесцяў — Марыі і Уладзіміра Ваўранюкоў, пасля абеду паедзем у Чыжы. Ёсць адна праблема — наш сын Аляксандар хоча святкаваць у Тыневічах, а дачка Ніна ў Чыжах, каб калядаваць са сваячкамі.

Валя Лаеўская:

— Святкуем у Беластоку. Традыцыйна, тры дні. Наша свята будзе мець экуменічны характар, да нас прыйдуць госці — католікі і евангелікі. Прыйдзе мая сястра з сям’ёй, у якой мы гасцявалі на каталіцкія святы.

Святы Мікалай прыходзіць ноччу і пакідае падаркі пад ёлкай.

— А каляднікі будуць?

— Я запрасіла тых што прыходзілі на каталіцкія святы. Як прыдуць — мы будзем рады!