Новыя падручнікі

Аляксей МАРОЗ

— Падабаецца нам графічнае афармленне падручнікаў. Цікавы матэрыял аб сучасных беларускіх мерапрыемствах. Тэксты аб сённяшнім жыцці і сучасныя беларускія творы — нагода пераканацца, што беларуская літаратура не стаіць на месцы, але развіваецца, — мяркуюць вучні.

— Літаратурныя творы, гістарычныя матэрыялы і крытычна-літаратурныя тэксты падбіраў я, маючы на ўвазе новы экзамен на атэстат сталасці. Найлепш, калі вучні самі аналізуюць творы. Аднак трэба, каб яны ведалі таксама крытычную літаратуру. Стараўся я замяшчаць фатаграфіі пісьменнікаў і здымкі з Беласточчыны, але мае магчымасці былі абмежаваны. Мог я прапанаваць да 60 фатаграфій. Шкада толькі, што здымкі надта паменшаны і таму некаторыя страцілі сваю адукацыйную вартасць, — заяўляе настаўнік беларускай мовы Ян Карчэўскі. — Каб падрыхтаваць матэрыял, многа трэба было сядзець у бібліятэцы. Найбольш я карыстаўся часопісамі і матэрыяламі, якія знаходзяцца ў бібліятэцы Беларускага музея. Уключаючы матэрыял пра Лявона Тарасэвіча і Сакрата Яновіча, хацеў я звярнуць увагу на сучасную беларускую культуру на Беласточчыне. Замяшчаючы матэрыялы пра „Бардаўскую восень” і іншыя сучасныя беларускія мерапрыемствы на Беласточчыне, хацеў зацікавіць ліцэістаў іх каранямі і сувязямі з беларускасцю. Пасля года працы з вучнямі можна будзе ацаніць, ці правільна падабраў я тэксты і пытанні. Праца настаўніка — гэта служба, а падручнік створаны дзеля той цудоўнай моладзі, якая яшчэ хоча вучыцца беларускай мове і літаратуры.

— Я многа ўвагі адвяла фальклору, бо хацела паказаць адметнасці характэрныя для нашай тэрыторыі, — гаворыць Іаланта Грыгарук. — Пішучы падручнік я старалася, каб выклікаў ён пашану да беларушчыны. Паказала я суадносіны паміж польскай і беларускай культурамі і літаратурамі.

— Мы ўжо не вучні падставовых школ, што трэба нам упрыгожваць падручнікі вялікай колькасцю здымкаў. Добра, што ў падручніках ёсць матэрыял, які будзе патрэбны ў час экзамену на атэстат сталасці, — дабаўляе Эльвіра Пліс. — Сярод вялікіх твораў, якія мы раней разглядалі, у падручніках ёсць самыя важныя фрагменты. Цяпер разам з крытычнай літаратурай яны нам больш зразумелыя і будзем маглі выкарыстаць іх на ўроках.

Зараз у Гайнаўскім белліцэі ёсць аўдыё- і відэакасеты з беларускімі праграмамі. Вучням паказваюць фільмы з фрагментамі пастановак літаратурных твораў. Белліцэісты пастаянна чытаюць „Ніву” і публікацыі ў „Часопісе”. Карыстаюцца творамі надрукаванымі ў кніжках прывезеных з Беларусі. Апошнім часам у школу купляюць штораз больш кніжак з творамі „белавежцаў”.